Жақында, Миялы балалар өнер мектебінің «Өнерге қанат қаққандар» атты жарты жылдық есеп беру концерті өтті.
Шара барысында өнерлі оқушылар әсем ән шырқап, мың бұрала би биледі. Күмбірлеген күй де, қобыздың сырлы үні де осы кеште естілді.
Сахна шымылдығын Миялы балалар өнер мектебінің оркестрі Сейілхан Құсайыновтың «Мереке» күйімен ашты. Одан әрі мектептің бишілері «Тойбастар», «Валенка», «Қамажай», «Вальс» билерімен көрерменнің ықыласына бөленсе, Қобызшылар ансамблі «Құттықтаймын, мама туған күніңмен!» шығармасын орындады. Сондай-ақ, «Киім үлгілеу» сыныбының оқушылары өз қолдарымен тіккен киімдерінен сән үлгісін көрсетіп, оны «16 қыз» әнімен «До-ми-соль-до» жігіттер квартеті сүйемелдеді. Ал, «Бейнелеу» сыныбының оқушылары «Қуыршақ» қойылымын көрерменге ұсынды.
Осы орайда, баланы өнерге баулып, қызығушылығын одан әрі шыңдап, сахна мәдениетін үйреткен ұстаздардың еңбегі зор.
Гүлмира МАҚСОТ
