Осындай тақырыппен «Арман» мәдениет үйінде Халықаралық және Республикалық конкурстардың лауреаты, «Еңбек даңқы» төсбелгісінің иегері, Дина Нұрпейісова атындағы халықтық музыка академиясы Атырау музыка колледжінің ұстазы, Мәкәлім Қойшыбаев атындағы балалар саз мектебінің ұстаздарынан құралған «Халықтық» ұлт-аспаптар оркестрінің көркемдік жетекшісі, бас дирижері Артур Қазиевтың шығармашылық кеші өтті.
Кешті Мәкәлім Қойшыбаев атындағы балалар саз мектебінің ұстаздарынан құралған «Халықтық» ұлт-аспаптар оркестрі «Мерекелік увертюра», «Жастар» шығармасымен ашты. Одан әрі Халықаралық, республикалық жыршы-термешілер байқауының жеңімпазы Бақытбек Сарсенов Артурды кішкентай кезінен өнерге баулыған атасы Оржан Қазиевтің «Тайсойған» термесін тебірене орындаса, Халықаралық, Республикалық конкурстардың лауреаттары Жасұлан Базарбаев, Ғаламат Тел, Ғибадат Тұрғалиев, Флора Рысбаевалар «Мөлдірім», «Көк шолақ», «Қазақ елі», «Туған жер», «Сарыарқа», «Шақырады көктем», «Жұмақ мекен», «Шымыр», «Майра», «Сарыжайлау», «Ауылым» әндерін нақышына келтіре шырқап, көрермендерді бір серпілтіп тастады. Ал кештің иесі Артур Бержанұлы «Майра», «Сағыныш» әндерін тамылжыта шырқап, ауылға деген сағынышын жеткізді.
Аудан әкімінің орынбасары Гүлшара Ізімова кеш иесін шығармашылық кешімен құттықтап, аудан әкімі Қ.Әзмұхановтың Алғыс хаты мен естелік сыйлық табыс етсе, Мәкәлім Қойшыбаев атындағы балалар саз мектебінің директоры Саулеш Құрманғалиқызы, Аманбай Өміров атындағы ұлт-аспаптар ансамблінің көркемдік жетекшісі Бауыржан Зұлхожаұлы және кеш қонағы «Құрмет» орденінің иегері, мәдениет қайраткері, профессор Сәлімгерей Садықов ізгі тілектерін жеткізді.
– «Ауылдан адам көшкенмен, адамнан ауыл көшпейді» демекші ауылды әрқашан сағынамын. «Алтын ұям ауылым» дегенде, адамның жүрегінде ерекше сезім пайда болады. Ауыл – біздің өміріміздің бастапқы кезеңі, балалық шақтың ең қымбат естеліктері сақталған мекен. Ахмет Байтұрсыновтың «Балам деген жұрт боламаса – жұртым дейтін бала қайдан шықсын» деген осы бір қанатты сөзіндей, ауылым өз ұлдарын қолпаштап, шығармашылық кешімді жоғары деңгейде өтуіне атсалысқан ауылдастарыма алғысымды білдіремін, – дейді кеш иесі Артур Қазиев.
Ата-бабамыздан мирас болған домбыраның шанағында күй ойнатқан Құрманғазы бабамыз бен Дина анамыздың жолын жалғаған ұрпақ барда қазақтың күй өнері мәңгі жасайтынына сеніміміз мол.
Кәмшат ӘБІШ
