Ел ертеңі саналатын жастардың сауатты әрі білімді болып жетілуі – заман талабы. Осы орайда, елімізде жастар саясатын дамыту бағытында жүйелі жұмыстар көптеп жасалуда. Соған орай, таяуда Сағыз ауылындағы Сағыз орта мектебінде 14-35 жас аралығындағы жастар арасында аудандық «Quiz» интелектуалды ойыны өтті.
Облыстық ішкі саясат басқармасының әлеуметтік тапсырысы шеңберінде «Жеті жарғы» қоғамдық бірлестігінің ұйымдастыруымен өткен білім сайысына Миялы, Мұқыр, Сағыз ауылдарынан барлығы 13 команда қатысты. Сайыстың ашылу салтанатында аудандық жастар ресурстық орталығының басшысы Ризабек Амантай құттықтау сөз сөйлеп, командаларға сәттілік тіледі. Ой ұшқырлығы мен тапқырлықты талап ететін бұл ойын алты бөлімнен тұрды. Әр бөлім сайын тапсырмалар мен сұрақтар күрделене түскен бұл сайыс расымен де тартысты өтті.
Нәтижесінде «MegaMiх» командасы жеңімпаз атанса, «Сағыз» және «Алаш» командалары екінші, үшінші орындарды өзара бөлісті. Аталмыш үш команда қараша айында Атырау қаласында өтетін «Quiz» интелектуалды ойынының облыстық кезеңіне жолдама алды. Ендеше, аудан намысын қорғайтын командаларға сәттілік тілейміз.
Дулат БЕРІКҰЛЫ
