Атырау облысы әкімдігінің қолдауымен, Х. Досмұхамедов атындағы Атырау университеті жанынан құрылған «Ұстаз» мектебі және «Зерделі» ақыл-ой дамыту мектебі мен «Таланттарды анықтау және қолдау» орталығы бірігіп, қала, аудандардағы 5-6 сынып оқушылары үшін қосымша оқу онкүндігін ұйымдастырды – деп, хабарлайды Атырау облысының өңірлік коммуникациялар қызметі.
«Ұстаз» мектебінің базасында 61 бала білімін шыңдады.
Облыс әкімінің орынбасары Бақытгүл Хаменова оқушылармен кездесіп, оларды әркез ізденімпаз болуға шақырды. Сондай-ақ, «Ұстаз» мектебінің білім берудегі басты мақсатына тоқталып өтті.
- Елімізде тұңғыш рет, облыс әкімдігінің қолдауымен ер балаларды дайындайтын «Ұстаз» мектебі жұмыс істеуде. Бұл мектепте 100-ден аса бала білім алып жатыр. Балаларға университеттің қолдауы көп. Өйткені, 9 бітірген оқушылар «Ұстаз» мектебіне 10-шы, 11-ші сыныпқа қабылданып, педагогикалық бағытта білім алады және «Зерделі» орталығының ерекше методикасымен ҰБТ-ға дайындалады – деді, облыс әкімінің орынбасары Бақытгүл Хаменова.
Атап өту керек, «Зерделі» ақыл-ой дамыту мектебінің жоғары санатты мұғалімдері ауыл балаларына тегін дәріс беріп, «Алтын сақа» математикалық олимпиадасына дайындады. Күзгі демалыстарын тиімді өткізген оқушыларға «Таланттарды анықтау және қолдау» орталығы атынан диплом, сертификаттар табысталды.
