Күллі мұсылман қауымының асыға күтетін мерекесінің бірі - Ораза айт екендігі белгілі. Отыз күн оразадан соң келетін бұл айтулы күн ауданымызда кең көлемде тойланып, үлкендерге де, балаларға да мерекелік көңіл-күй сыйлады.
Миялы ауылындағы «Бәйтерек» мешітіне таңғы сағат жетіден бастап жиналған жергілікті жамағат бір-бірін мерекемен құттықтап, мәре-сәре болып жатты. Содан соң аталмыш мешіт бас имамы Мұрат Сұлтанов:
– Бұл тек діни мереке емес. Ұлтымыздың қанына сіңіп, дәстүрге айналған ең ерекше мейрам. Оған халқымызда жиі кездесетін Айтжан, Айтгүл, Айтбек, Айталы деген есімдер дәлел. Одан бөлек, үлкендеріміз отыз күн оразадан соң ағайын-туысын аралап, «Айтыңызбен!» деп құттықтап, барған үйлерде жайылған айттық дастарханнан ауыз тиген. Міне, қадірі мен қасиеті мол осындай ерекше күнді барынша кең көлемде тойлаған абзал, - деді. Сол күні таңертегі сағат 8:00-де ауданның барлық мешітінде айт намазы оқылып, елдің амандығы үшін дұға етілді.
Дархан – «Жамағат барысы»
Бұл мереке Миялы ауылында орталық стадионда аталып өтті. Сол жерде балаларға арналып үрмелі ойын алаңы (батут) қойылса, үлкендер жағы спорттық сайыстарда өзара кім мықтыны анықтады. Әсіресе, қазақ күресінен өткен «Жамағат барысы» турнирі көпшілік көрерменнің делебесін қоздырды. Бұл жарыс екі салмақ дәрежесі бойынша өтті. Жеңіл балуандар 70 келіге дейін салмақ дәрежесі бойынша белдессе, одан жоғары салмақтағылар «Жамағат барысы» атағы үшін сынға түсті. Сондай-ақ, мереке күні аудандық мәслихат депутаты, «Атамекен» кәсіпкерлер палатасы аудандық филиалының директоры Алтынзер Баймұратова балаларға балмұздақ таратып, мәз-мейрам күйге бөледі.
Аталмыш жарыстың тағы бір ерекшелігі - кәсіби спортшыларға қатысуға тиым салынды. Кіші салмақ дәрежесі бойынша өткен жарысқа 23 балуан қатысты. Нәтижесінде барлық қарсыласынан басым түскен Ақылбек Кенжебай жеңімпаз атанса, екінші орынды Амандық Ермекбаев, үшінші орынды Ізбасар Айтжанұлы иеленді. Ал, 21 балуан белдескен түйе балуандар сайысында Дархан Қошан қарсылас шақ келтірмей «Жамағат барысы» атанса, Сейілхан Оқас екінші, Азамат Серік үшінші орынға қол жеткізді. Жеңімпаз-жүлдегерлер арнайы белдікпен және ақшалай сыйлықпен марапатталды.
Бұдан соң арқан тартыс сайысы ұйымдастырылды. Оған Миялы, Жангелдин ауылдарынан барлығы 12 команда қатысты. Тартысты өткен додада бірінші орынды 1998 жылы туған жастар, екінші орынды 1993 жылғылар, үшінші орынды 1994 жылы дүниеге келген ауыл азаматтары иеленді. Оларға да диплом және ақшалай сыйлық табыс етілді.
Сағыздағы сайыпқырандар сайысы
Ораза айт мерекесі Сағыз ауылында вокзалдың қасындағы орталық алаңда ұйымдастырылды. Онда алдымен сөз алған «Абдолла Хазірет» мешітінің бас имамы Нұрмұхамбет Шахмансұр ауыл тұрғындарын айтулы мерекемен құттықтап, сайысқа қатысушыларға сәттілік тіледі. Бұдан соң сағыздық тұрғындар ұлттық ойындардан өткен сайыстарға қатысты.
Кіл мықтыдан шын мықтыны анықтаған сайыстар нәтижесінде қазақ күресінен Дамир Асылбекұлы топ жарса, қол күресінен Алдаберген Тегісбай, қой көтеруден Нұртас Есжан, аударыспақтан Ғибрат Әмірше, кір тасын көтеруден Ойыл ауданынан келген Мереке Жаңабаев, арқан тартыстан «Серілер» командасы жеңімпаз атанды. Олар мешіт жамағаты атынан диплом және қаржылай сыйлықтармен марапатталды. Сол сияқты шара барысында балаларға тегін балмұздақ таратылып, мешітке берілген пітір садақасы есебінен 15 мұқтаж отбасыға азық-түлік себеті мен қаржылай көмек берілді.
Сайып келгенде, мәні мен маңызы зор мерекені тойлау өз дәрежесінде өтті. Әйтсе де, осындай игі шараға аудан басшыларының төбе көрсетпегені көңілге кірбің ұялатады. Алдағы уақытта аудан басшылары оң көзкөзқарас танытып, аталмыш олқылықтың орнын толтырса игі.
Дулат БЕРІКҰЛЫ
