"Бас жүлде Исатай ауданының тумалары - Кенжешовтер отбасында.
"Нұрмұхан Жантөрин атындағы филармонияда «Мерейлі отбасы» ұлттық конкурсының облыстық кезеңінің марапаттау салтанаты өтіп, өнегелі отбасыларды Атырау облысы әкімінің орынбасары Бақытгүл Хаменова құттықтады" деп хабарлайды Атырау облысы өңірлік коммуникациялар қызметі.
– Отбасы құндылықтарын дәріптеу мақсатында дәстүрге айналған «Мерейлі отбасы» конкурсы биыл облысымызда 7-ші рет өткізіліп отыр. Отбасы бірлігі – Отанның бірлігі. Ағайынның татулығы – Атамекеннің тұтастығы. Сіздер сайысқа түскен 60-қа жуық жанұя арасынан өздеріңіздің кемеңгерлік пен ұлағаттылық сипаттарыңыздың арқасында дараланып шықтыңыздар, - деді Бақытгүл Қайыржанқызы.
Сайыстың бас жүлдесін Исатай ауданынан келген Кенжешовтер отбасы жеңіп алды.
Жеңімпаз отбасының тірегі Кенжешов Құрманбек биыл жетпіс жасқа аяқ басқалы тұр. Жанұяның ұйытқысы болған жан жары Гүлден Мұхамеджанова екеуінің отасқандарына 46 жыл болыпты. 3 қыз бен 4 ұлды тәрбиелеп өсірді.
Зейнеткерлік жасқа дейін екеуі де теміржол саласында қызмет атқарған.
Еске сала кетелік, «Мерейлі отбасы» ұлттық конкурсын еліміздің барлық аймағында өткізу дәстүрге айналған.
Байқаудың басты мақсаты – қазақстандық отбасының жағымды имиджін насихаттап, ғасырлар бойы жалғасып келе жатқан отбасы құндылықтарын жаңғырту болып табылады. Осы орайда конкурстың облыстық комиссиясының қарауына 59 өтініш түсіп, олардың ішінен 15 отбасы ұлттық конкурстың дипломанттары атанды.
