Таяуда, Ойыл ауылдық округіндегі «Шалқыма» мәдениет үйінде осындай тақырыпта аудандық аналар мен қыздар слеті болып өтті.
Шараны аудандық мәслихат төрағасы Толқын Бейсқали ашып, ізгілігі мен пайдасы зор аудандық аналар кеңесінің жұмысына сәттілік тіледі.
Өнегеге толы шарада ұйымдастырушылардың дайындаған бейнебаян көрсетіліп, сол бейнебаяндағы тақырып бойынша сахнаға «Нұршуақ» балабақшасының басшысы Бақытжамал Жұмабаева, «Алтын алқа» иегері Іңкәр Қаленова, «Елсана» рухани-патриоттық қауымдастығының жетекшісі Гүлшара Сарылар спикер ретінде шақырылып, келген қыздар мен аналарға қоғамның кеселіне айналған гаджеттің келтірер зиянын түсіндірді.
Одан соң, екінші бейнбаян көрсетіліп, ерте жастағы жүктілік туралы тақырып көтерілді. Ол тақырыпта аудандық аурухана директорының ана мен бала жөніндегі орынбасары Света Сақтағанова, аудандық білім бөлімінің бас маманы Бақтыгүл Нұғманова, Жаңашаруа орта мектебі директорының тәрбие ісі жөніндегі орынбасары Гүлфина Қойшығалиевалар спикер ретінде сөз сөйлеп, ауданда орын алған жасөспірімдер арасындағы жүктілік туралы талқылап, аналар мен қыздарға ақыл кеңесін беріп, жасөспірімдермен үнемі байланыста отыруларына тілектестік білдірді.
Қаймағы бұзылмаған Қызылқоға топырағында мұндай келеңсіз оқиғалар тіркелгендігін естіп жиналған жұрт аң-таң болып қалды.
Шара барысында, аудандық ішкі саясат бөлімінің басшысы Асқар Ақтаев сөз сөйлеп, Шүкір Еркінов атындағы орта мектеп директорының Ана және бала жөніндегі орынбасары Айзада Қосдәулетова, білімді, талапты, заманауи білімді игерген ұрпақ тәрбиелеуде қосқан үлесі үшін Гүлжамал Қамзина, Гүлфира Сисенбай, Флора Сәрсенғалиева, Садқаным Оңаловаларды аудан әкімі Қанат Әзмұхановтың Алғыс хатымен марапаттады.
Керемет кешті өнерімен Ләззат Тастаева жетекшілік ететін «Аманат» хорының әндері одан әрмен әрлендіре түсті. Аналар слетінің соңы Миялы ауылдық аналар кеңесінің төрайымы Анар Арыстанғалиева бастаған аналар кеңесі мүшелерінің әсем әнімен аяқталды.
Ақнұр ДҮЙСЕНҒАЛИ
