Атырау обл, Миялы ауылы, Қ.Сәтбаев көшесі, №17 үй. 8 (712) 3821738 mialy44@mail.ru

2023 жылғы 5 қарашада өткен Қызылқоға мен Исатай аудандарының әкімін сайлау қорытындысы шықты, деп хабарлайды AtyrauPress тілшісі.

Қызылқоға аудандық аумақтық сайлау комиссиясының мәліметінше, ауданда 18614 сайлаушының 10653-і дауыс берген. Сайлауда үш үміткер бақ сынады. Мағжан Жексенов 892, Сәндібек Салықов 1137 дауыс жинаса, ауданның қазіргі әкімі Қанат Әзмұханов 8556 дауыспен айқын басымдықпен жеңіске жетті. «Барлығына қарсы» белгісі бар бюллетеньдер саны – 56. Қанат Қадыржанұлы 1981 жылы туған, Қызылқоға ауданы Миялы ауылының тұрғыны.

Ал, Исатай аудандық аумақтық сайлау комиссиясының мәліметінше, мұнда сайлаушылар тізіміне 15883 азамат енгізілген. Дауыс беруге 8675 сайлаушы қатысқан. Сайлауға түскен үш кандидаттың ішінде Асылан Ғұбаш 1327, Рашид Муканов 2295 дауысқа ие болса, Нұрым Мусин 4934 дауыспен аудан әкімі болып сайланды. «Барлығына қарсы» белгісі бар бюллетеньдер саны – 35. Нұрым Бекежанұлы 1980 жылы туған, Исатай аудандық мәслихатының төрағасы, Исатай ауданы Аққыстау ауылының тұрғыны.

Амандық САҒЫНТАЙҰЛЫ

 2023 жылғы 5 қарашада Атырау облысы Қызылқоға ауданы әкімінің сайлауы өтті. Сайлаушылар тізіміне 18614 азамат енгізілді. Дауыс беруге - 10653 сайлаушы, оның ішінде есептен шығару куәліктері бойынша болған жоқ. Дауыс беруге арналған үй-жайлардан тыс – 238 қатысты.

Еліміздің болашағының мықты болуына, дамуына әрбір азаматтың ықпалы тисе құба-құп.

"Отан отбасынан басталады" демекші, Тайсойған ауылдық округіне қарасты №154 сайлау учаскесіне ерлі-зайыпты Мұрат Сексенбаев пен Зәмзәгүл Қойшыбаева бірге келіп, өз дауыстарын берді. Осы орайда, отбасылы жұп:

- Біз елімізде өтетін әр сайлаудан қалмай, мүмкіндігінше атсалысуға тырысамыз. Еліміздің ертеңі әркез алаңдап отырамыз. Аудан әкімін сайлау тұңғыш рет өткізіліп тұр. Бұл өзгеріс өте жақсы деп ойлаймыз. Отбасымызбен өз таңдауымызды жасадық. Енді, халықтың игілігі үшін еңбек ететін әкім сайланса екен,-деп тілектерін білдірді.

Ақнұр ДҮЙСЕНҒАЛИ

Аудан және облыстық маңызы бар қала әкімдерін сайлау процесі ашық әрі әділ өтіп жатыр. Сағат 17.00-дегі ақпарат бойынша сайлаушылардың 53,7 пайызы дауыс беріп үлгерді, деп хабарлайды atr.kz тілшісі.

Бұл туралы Атырау облыстық аумақтық сайлау комиссиясының төрағасы Азамат Айманакумов айтты.

—Саяси дода өтіп жатқан екі аудандағы учаскелерде қатаң бақылауда.Қызылқоға және Исатайда барлығы 80-нен астам байқаушы қызмет етуде. Оның ішінде кандидаттардың сенім білдірген адамдары, саяси партиялардың сенімді өкілдері және бұқаралық ақпарат құралдары мен қоғамдық ұйымдардың қызметкерлері қатысуда. Облыс бойынша барлығы 11 қоғамдық ұйым аккредиттелген, – деді А.Айманакумов.

Оның айтуынша, қазір сайлауды ұйымдастыру және өткізу бойынша ешқандай шағым түскен жоқ. Саяси дода елдегі белгіленген заңдылықтар бойынша өтіп жатыр.

Бүгін біраз ауылда сайлау спорттық сайыспен ұштасып, тұрғындарға керемет мерекелік көңіл-күй сыйлады.

Атап айтқанда, Қарабау орта мектебіндегі №153 сайлау учаскесі ләңгі тебу, қол күресі, кір тасын көтеруден сайлаушылар арасында сайыс ұйымдастырды. Бұл сында ләңгі тебуден Құбаш Өтеғалиев дара шықса, екінші орынды Қарасай Аманғалиев, үшінші орын Мереке Балаубаев иеленді. Ал, кір тасын көтеру сайысынан Диас Жасқанатұлы жеңімпаз атанса, екінші, үшінші орындарды Бейбарыс Өмірзақ пен Бекнұр Болатбекұлы өзара бөлісті. Жеңімпаз-жүлдегерлер диплом және медальдармен марапатталды.

Дулат ҒҰБАЙДУЛЛИН

Елімізде тұңғыш рет пилоттық жобада өтіп жатқан аудан әкімінің сайлауына Қызылқоға ауылдық округінің тұрғындары да белсенді қатысуда.

Қарабау орта мектебінде орналасқан №153 сайлау учаскесінде барлығы 823 сайлаушы бар. Учаске төрағасы Абзал Шоқанның айтуынша, олардың жиырмасы денсаулығына және қарттығына байланысты үйден дауыс беруге өтініш берген. Қазіргі сәтте 386 сайлаушы өз таңдауын жасап үлгерген. Бұдан бөлек учаскелік сайлау комиссиясының екі мүшесі тасымал жәшігі арқылы Бұқар елді мекені тұрғындарының үйіне барып, олардың дауыс беруіне мүмкіндік жасады.

Дулат ҒҰБАЙДУЛЛИН

Қызылқоға ауданында өтіп жатқан сайлау күнінде аудандық орталық ауруханада ұл бала дүниеге келді.

Осындай маңызды күні дүниеге келген атқамінердің бойы 51 сантиметр болса, салмағы 3250 грамм болатын. Аудан әкімін сайлау күнінде өмірге келген сәби отбасының төртінші перзенті екен. Қызылқоға аудандық ауруханасы перзентхана бөлімшесінің акушер-дәрігері Светлана Сақтағанованың айтуынша, қазіргі таңда ананың да, сәбидің де жағдайы жақсы. Ұл бала дәл бүгін сағат 15:50-де дүниеге келді.

Нұрсәуле ЖАУЫНБАЕВА

Түстен кейін №144 сайлау учаскесіне үйден дауыс беруге өтініш бергендердің қатарында төтенше жағдайлар саласының ардагері, бүгінде аудандық ардагерлер кеңесінің төрағасы Мақсот Каринмен жолдасы да бар. Аудандағы іргелі істердің ілкімді екендігіне тоқталған Мақсот Сағынұлы халықтың тыныс-тіршілігі жақсарып келе жатқандығын тілге тиек етті.

​– Бүгін ерекше науқанның куәсі болып жатырмыз. Президенттің өткен жылғы халыққа арнаған Жолдауында айтылған мәселе іске асуда. Осы арқылы демократияға бетбұрыс жасалады деп ойлаймын. Осылайша Жолдау жолдаған міндет жүзеге асып жатқанын көріп отырмыз. Әкімдікке үміткер ретінде қатысып жатқан азаматтар бұған дейін де өздерінің іскерлігін көрсетіп келе жатқаны белгілі. Барлығы да ел үшін қызмет ететін азаматтар. Кім сайланса да алдағы уақытта ауданда жасалып жатқан жұмыстардың жалғасын табатынына сенім білдіремін. Халықтың сеніміне ие болған әкім халықтың мұң-мұқтажын тыңдап, бастаған істерін аяқсыз қалдырмауы қажет. Әсіресе, жол, электр жүйесі, ауыз су жүйелерін басты орынға қойып жүзеге асыруға талаптануы қажет, - деді ол.

Алмас ҚАБДОЛОВ

сурет автордікі

ФОТОГАЛЕРЕЯ

Біріңғай мемлекеттік байланыс

Aqprint

Байланыс номерi :     +7 702 132 03 32      +77122458521