Балалар жылына орай, Түркістан облыстық дене шынықтыру және спорт басқармасының ұйымдастыруымен Отырар ауданының Құрметті азаматы, белгілі бапкер Жонарбек Қаныбекұлының жүлдесіне арналған самбодан халықаралық турнир өтті.
Оған 2007-2009 және 2010-2012 жылдары туған ұлдар мен қыздар арасындағы турнирде жерлесіміз Еркенұр Қуат ешкімге дес бермей жеңімпаз атанды.
+41 салмақ дәрежесінде күрескен Еркенұр Қуат алғашқы боп отырарлық қарсыласын 8:0 есебімен ұтса, екінші белдесуде Сарыағаш ауданының палуанымен шығып, финалға жолдама алды. Финалда шымкенттік қарсыласын айқын басымдықпен 8:0 есебімен жеңіске жетті. Осы тұста, Еркенұр Қуаттың бапкері Марат Әбдуалиевтің еңбегі орасан зор.
Нұрсәуле ЖАУЫНБАЕВА
