Лудомания – бұл тек жеке адамның мәселесі емес, тұтас қоғамға кері әсер ететін әлеуметтік дерт. Құмар ойындарға тәуелділік адамның психологиялық күйіне, отбасылық қарым-қатынасына және әлеуметтік жауапкершілігіне ауыр салдар тигізеді.
Соңғы жылдары бұл құбылыстың кең таралуы қоғамда алаңдаушылық туғызып отыр. Құмар ойынға тәуелді адам уақытын, қаржысын және болашағын ойынға тігіп, өз әрекетінің салдарын бағамдай алмайды. Нәтижесінде қарызға батуға, заң бұзушылыққа, тіпті отбасылардың бұзылуына дейін апаратын жағдайлар жиі кездеседі. Әсіресе жастар арасындағы лудомания – ұлт болашағына төнген үлкен қауіп.
Мемлекет тарапынан лудоманияның алдын алу бағытында заңнамалық шектеулер күшейтіліп, профилактикалық жұмыстар жүргізіліп келеді. Алайда бұл індетпен күрес тек мемлекеттік органдардың міндеті емес. Отбасы, білім беру мекемелері және қоғам болып бірлесе әрекет еткенде ғана нақты нәтижеге қол жеткізуге болады. Жастардың бос уақытын тиімді ұйымдастыру, салауатты өмір салтын насихаттау және қаржылық сауаттылықты арттыру – лудоманиямен күрестің басты тетіктері.
Лудоманияға қарсы күрес – бұл адам тағдырын, отбасы бірлігін және қоғамның тұрақтылығын қорғау. Әрбір азамат осы мәселенің маңызын түсініп, құмар ойындарға тәуелділіктің алдын алуға өз үлесін қосуы тиіс.
Өз тілшіміз
