Президент Жолдауында көтерілген «өркениетті әрі озық елдің заңы – әділ, билігі – білікті, ал азаматтары – саналы және белсенді болуы қажет» деген тұжырым еліміздің стратегиялық даму бағытын айқын көрсетеді. Бұл қағида қазіргі заман талаптарына толық сәйкес келеді және мемлекеттің жан-жақты жаңғыруына негіз болатын басты құндылықтарды белгілейді.
Әділ заң үстемдігі – қоғамдағы тұрақтылықтың, азаматтардың мемлекетке деген сенімінің, экономикалық өсім мен әлеуметтік әділдіктің негізгі тірегі. Білікті басқару жүйесі – қабылданатын шешімдердің сапасын арттырып, реформалардың тиімді орындалуына жағдай жасайды. Ал саналы әрі белсенді азаматтар – мемлекетті алға жетелейтін қозғаушы күш. Өйткені қоғамдық процестердің табысты жүзеге асуы ең алдымен халықтың жауапкершілігіне, белсенді азаматтық ұстанымына тікелей байланысты.
Президент атап көрсеткендей, жаңа дәуірде, әсіресе жасанды интеллект қарқынды дамып жатқан кезеңде, мемлекет те, қоғам да өзгерістерге бейім болуы тиіс. Бұл – білім беру, экономика, мемлекеттік басқару, қауіпсіздік, әлеуметтік сала секілді барлық бағытта кәсіби күш-жігерді талап ететін кешенді жұмыс.
Сондықтан әділ заң, тиімді басқару және белсенді азаматтық қоғамды қалыптастыру – ел дамуының жаңа сапалық деңгейіне өту үшін аса маңызды. Бұл ұстанымдар Қазақстанның ұзақ мерзімді стратегиялық мақсаттарына жету жолында шешуші рөл атқарады.
Салтанат НҰРҒАЛИЕВА
