Жақында ауданның мәдениет саласында, соның ішінде кітапхана жүйесінде ұзақ жыл еңбек еткен кітапханашы Роза Әбілханованың зейнеткерлік жасқа толуына орай «Арман» мәдениет үйінде «Жүректе тұнған жыр, кітаппен өрілген жол» атты шығармашылық кеші болып өтті.
Осыдан тура 62 жыл бұрын Сағыз стансасында теміржолшы отбасында дүниеге келген Роза он үш перзенттің жетіншісі болатын. Ташкент теміржол институтын бітірген әкесі Самсин теміржол стансасында дистанция бастығы болып жұмыс жасаса, анасы Нәзен отбасында бала тәрбиесімен айналысты. Жастайынан кітап оқуға құмар болған ол мектеп бітірген соң кітапханашы мамандығын алып, еңбек жолын аудандық орталық кітапханада библиограф болып бастайды. Сол кездегі кітапхана меңгерушісі Зәмзәм Дәулетованың қарамағында қітапханашының қыр-сырын үйренеді. Уақыт өте келе оқырмандарға қызмет көрсету бөлімінің меңгерушісі, аудандық балалар кітапханасының директоры қызметінде болып, осы уақытқа дейін аудандық орталық кітапханада кітапханашы болып жұмыс жасады. Балалар кітапханасында жұмыс жасаған уақытында балаларды кітап әлемінің ғажайыптарына жетелеп, олардың кітап оқуға ынтасын арттыруда көп еңбек етті. Қасиетті қазынамызды көздің қарашығындай сақтап, насихаттап, ел игілігіне жаратып жүрген кейіпкеріміздің өлең шығаратын ақындығы да бар. Оның аудандық шығармашылық орталығы дайындаған «Өмір өрнектері» атты кітапшасы шықса, облыстық мәдениет, архивтер және құжаттама басқармасының «Бабалар сөзі – ақылдың көзі», аудан ақындарының «Қыр тынысы» топтамасына өлеңдері енді. Ол бүкілқазақстандық кітапханашылар съезіне аудан кітапханашылары атынан делегат болып қатысса, республикалық «Рухани қазына-2022» фестиваліне қатысып, жүлдегері атанды. Кітапхана саласына сіңірген еңбегі басшылық тарапынан жоғары бағаланып, «Кітапхана ісінің үздігі» және «Еңбек даңқы» төсбелгісімен марапатталды. Жолдасы Ғизат Жолжанұлы ұзақ жыл аудандық электрмен қамту мекемесінде абыройлы еңбек етіп, зейнеткерлікке шықса, әр салада еңбек етіп жатқан ұлдары Сейқуат, Азамат, Айболат, Нұрболат, Қанағаттар бір-бір отбасының егесі. Олардан өрбіген немерелеріннің қылығын қызықтап, тәлім-тәрбие беріп отырған Роза бүгінгі таңда «Арман» мәдениет үйі жанынан құрылған «Ақ әжелер» ансамблінің мүшесі.
Кеш шымылдығын әнші Зәуре Жұмағалиеваның жергілікті сазгер Қалидолла Ізекеннің сөзі мен әніне жазылған «Арман шуағы» әнімен ашқан соң құттықтау тілегін білдірген аудандық мәслихат төрағасы Толқын Бейсқали:
– Бүгінгі кеш иесі Роза Сәмсинқызы аудан халқын өрелі өнермен сусындатып, рухани байлықты толықтыруға және игі дәстүрлерді жалғастыруда аянбай еңбек еткен жанның бірі. Мәдениет пен өнер – ел өміріндегі өте маңызды сала. Өнер – ұлттың жаны, ал мәдениет – рухани келбеті десек, ауданымыздың өнері мен мәдениетіне сүбелі үлес қосып, осы саланың мерейін көтеріп жүрген Сізге айтар алғысымыз көп. Сіз арқылы, киелі өнер жолында қасиетті Қызылқоға өңірін елге танытып, биік тұғырдан көрсетіп жүрген барлық мәдениет саласы қызметкерлерінің еңбектеріне жаңа шығармашылық ізденістер тілеймін. Бүгінгі күні зейнеткерлік жасқа құрметпен жетіп, әріптестер арасында зор қошеметке бөленіп отырсыз. Сізге берекелі зейнеткерлік пен мерекелік күндер серік болсын, - деп кеш иесі Роза Әбілхановаға гүл шоғы мен Құттықтау хатын табыс етті.
Бұдан кейін сөз алған аудандық мәдениет, тілдерді дамыту, дене шынықтыру және спорт бөлімінің бас маманы Гауһар Құрманғазиева, кәсіподақ ұйымының төрайымы Нұржамал Жексенғалиева, сала ардагерлері Сара Сатымова, Какима Қарақойшықызы, әріптестері Гүлжан Айсағалиева, Жанаргүл Қабдолова, «Ақ әжелер» ансамблінің мүшесі Бағыт Нығмет, аудандық ардагерлер кеңесінің төрағасы Сағидолла Яқыптар әріптесіне ізгі тілектерін арнап, сый-сияпаттарын табыс етсе, мәдениет саласының ардагері, ауданның Құрметті азаматы Жәния Ізбасқан, достары атынан құрбысы Балжан Жалғасбаева жүрекжарды құттықтауларын бейнебаян арқылы жеткізді.
Шара барысында өз тілегін білдірген Роза Әбілханова: «Біз балалық, жастық шағымызда кітапты көп оқитынбыз. Менің кітапханашы мамандығын таңдауыма Сағыз ауылдық кітапханасының кітапханашысы Алтын Жұмашеваның ықпалы тиді. Өйткені сол кітапханаға барғанда Алтын апай іздеген кітаптарымды тауып беретін. Кітапхананың кітаптарын оқып тауысқасын, шетел жазушыларының аудармаларын оқытты. Ал, жұмысқа кіргенде басшымыз Зәмзәм апайдың үйретуімен, қатал тәртібімен, талабымен сол кездегі КПСС тарихынан бастап В.Лениннің томдарын, К.Маркстің «Капиталын» оқыдық. Соңында батырлар жырларын, аңыздарды жатқа айтатын болдық. Ал, өлең жазу оқушылық кезден басталды. Сыныптастарға әзіл-сықақ өлеңдер жазамын, кейбір өлеңдерім қабырға газетіне шығатын. Оқуға түскенде де кураторым мерекелік шараларға, басқа да жиындарға өлең шығартып жүрді. Өлең шығару да оңай емес. Ақиық ақын Мұқағали Мақатаев айтқандай, өлең деген жайшылықта келмейді, қайта қарбалас тіршілікте келеді. Оны сол сәтте жазып алмасаң санаңнан өшіп қалады. Бүгінгі шараны ұйымдастырып жатқан әріптестеріме алғысымды білдіре отырып, үнсіз жүріп үлкен істер атқаратын кітапханашылардың еңбегі зор екендігін айтқым келеді» деп көрермендерге өзінің шығарған «Әке» өлеңін оқып берді.
Ұрпақтары атынан сөз алған ұлы Сейқуат, ағайындары мен құда-жекжаттары, құрдас-достары тағылымы мол шараны ұйымдастырушыларға алғыстарын білдіріп, кеш иесіне зор денсаулық, отбасына бақ-береке тілесе, әріптесі Айкөркем Тайлыбекова ақынның «Жұбату» өлеңін, аудандық балалар кітапханасының оқырмандары Назым Орынғали, Тілекнұр Қанат, Александра Амантай, Тілекші Әбдірахман, мәдениет үйінің қызметкерлері Жарқын Нәбиева мен Заманбек Абзалұлы «Наурыз көктем», «Жаз», «Күз келді», «Қыс» өлеңдерін оқып, «Ақ әжелер» ансамблі «Ақтамақ» әнін орындады. Мерекелік шарада туыстары атынан да ән шашулары шашылып, әулеттің жиені Анар Алтыбайқызы «Ана», әулеттің келіні Айдана Тасқынбайқызы немересі Нұраймен «Ана мен қыз», немересі Айару Азаматқызы «Ата-әже», мәдениет үйінің әншісі Мейрамгүл Болатқызы «Бақытты әйел» әндерін тамылжыта шырқады Кеш кітапхана жастарының орындауындағы жергілікті сазгер Ерболат Қарақойшының «Уақыт» әнімен тәмамдалды. Сөйтіп, көңілге көрікті ой ұялатқан шара өз мәресіне жетті.
Бауыржан БЕРДІҒАЛИЕВ
