Атырау өңірінде білім беру инфрақұрылымын жаңғырту бағытында жүзеге асып жатқан «Келешек мектептері» ұлттық жобасы соңғы жылдары ерекше назарға ие болып отыр. Өңір мектептеріндегі орын тапшылығын азайту, үш ауысымдық оқыту мәселесін шешу және балаларға заман талабына сай оқу ортасын қалыптастыру — осы жобаның негізгі мақсаты. Атырауда жаңа үлгідегі мектептер қарқынды салынуда. Жаңа нысандар тек заманауи ғимарат қана емес, оқыту сапасын жаңа деңгейге көтеретін кешенді білім орталықтары ретінде жоспарланған.
Құрылыс сапасы мен жабдықталуы да ерекше қадағалауда. Жоба талаптарына сәйкес, әр мектепте STEM-зертханалар, робототехника кабинеттері, интерактивті сыныптар, мүмкіндігі шектеулі балаларға арналған қолжетімді орта, спорт және өнер залдары мекеме құрамына кіреді. Бұл инфрақұрылымның бәрі — өңірде білім алатын баланың халықаралық стандартқа сай жағдайға ие болуы үшін жасалып жатқан қадам. Сапаға жауап беретін негізгі құрылым — мердігер компаниялар мен техникалық қадағалау ұйымдары. Дегенмен, құрылыс барысын бақылау тек мердігерлерге ғана жүктелмейді: облыстық білім басқармасы, әкімдік, сонымен бірге жергілікті қоғам тарапынан қоғамдық бақылау да күшейтілген.
Атырау облыстық білім беру басқармасының баспасөз хатшысы Ләззат Еділхан бұл жобаның өңірлік маңызын былай түсіндіреді: «Келешек мектептері — жай ғана жаңа ғимарат емес, ол — балалардың білім алу ортасын түбегейлі жаңарту. Біз үшін ең маңыздысы — бала санының көптігіне байланысты пайда болған орын тапшылығын жою және әр оқушыға қауіпсіз, технологиялық әрі қолайлы орта ұсыну. Құрылыс сапасы мен жабдықталуына қатаң бақылау орнатылған. Бұл — өңірдің ұзақ мерзімді білім саясатының нақты қадамы», — дейді ол.
Жаңа мектептер педагогтерге де жаңа міндет артып отыр.
Б.Қанатбаев атындағы мектептің мұғалімі Амангүл Тоқсанова өз пікірінде: «Келешек мектептеріндегі инфрақұрылым мұғалімге мүмкіндік береді, бірақ жауапкершілікті де арттырады. STEM-зертхана, робототехника кабинеті, жаңа буын мультимедиалық сынып — бұлардың бәрін тиімді пайдалану үшін мұғалім үнемі ізденісте болуы керек. Оқушылардың қызығушылығы артқан сайын біз де соған сай жаңа әдістеме, жаңа формат қолдануға тиіспіз. Жоба ең алдымен — білім беру мазмұнын жаңартуға итермелейді», — деп атап өтеді.
Ал атыраулық ардагер ұстаз Бағилат Абдолова жаңа мектептердің ашылуын білім беру жүйесінің ұзақ жылдар бойғы мәселелерін жеңілдететін мүмкіндік деп бағалайды.
«Біздің кезімізде сыныптарда бала саны жиырмадан асса, оны көп көретінбіз. Қазір кей мектептерде мұның екі-үш есе артқаны жасырын емес. Жаңа мектептер — осы олқылықты толтырудың амалы. Ең бастысы, мұндай білім ордалары балалардың ой-өрісін кеңейтіп, технологияға жақындауына жағдай жасайды. Бірақ меніңше, ең маңыздысы — мұғалімнің шеберлігі. Қандай ғимарат болса да, оны адамдық жылулық пен ұстаздық парасат толықтырады», — дейді ол.
«Келешек мектептері» жобасы өңірдің тек ағымдағы мәселесін емес, болашақтағы әлеуметтік сұранысын да шешеді. Халық саны өсіп жатқан Атырау үшін жаңа мектептер — демографиялық, әлеуметтік және экономикалық дамудың да көрсеткіші. Мұнда ашылатын қосымша үйірмелер, шығармашылық орталықтар, спорт бағыттары балалардың жан-жақты дамуына жол ашады. Инклюзивті орта қалыптастыру арқылы ерекше білім берілуіне қажеттілігі бар балалар үшін де қолайлы жағдай туындайды. Сонымен бірге жаңа мектептер педагог кадрларға сұранысты арттырып, мамандардың кәсіби дамуына жол ашады.
Қорыта айтқанда, Атырауда салынған және салынып жатқан «Келешек мектептері» — өңірдің білім беру кеңістігін жаңа деңгейге көтеретін стратегиялық жоба. Оның жемісті болуы құрылыс сапасына ғана емес, мұғалімдердің кәсіби дайындығына, басқару жүйесінің тиімділігіне және қоғамның белсенді қолдауына байланысты. Жаңа мектептер ашылған сайын балалардың сапалы білімге қолжетімділігі кеңейіп, өңірдің интеллектуалдық әлеуетін арттыруға зор мүмкіндік туып отыр.
