Соңғы мәліметтерге сәйкес, қазір Ойыл өзенінен ауданға төніп тұрған қауіп жоқ. Жауапты мамандар өзен арнасын тұрақты түрде бақылауға алған. Атырау облысындағы су нысандарының деңгейі мен жағдайына тұрақты мониторинг жүргізу мақсатында «Қазгидромет» РМК Атырау облыстық филиалы мемлекеттік бақылау желісі бойынша деректеріне сүйенсек, 1 сәуірдегі гидрологиялық бақылау нәтижелері бойынша Ойыл өзенінің (Миялы ауылы маңында) таңғы 08:00 және 12:00 уақыттарында су деңгейі өзгеріссіз қалып, 564 сантиметр деңгейінде тұрақтағанын көрсетеді.
Алайда, ауданымызда әлі де болса тасқынға қарсы қызмет қарқынды түрде ұйымдастырылуда. Аудан әкімдігінің баспасөз қызметі мәліметіне сүйенсек, 9 ауылдық округтің 14 елді мекенінде су тасқынының алдын алу шаралары жүйелі түрде атқарылып, 54 шақырым қорғаныш бөгеттері тұрғызылды. Жоспар 100 пайыз орындалды. Сонымен қатар, ауыл маңындағы бөгеттердің осал тұстарын бекіту және жаңадан салынған көпірлерді тасқын суынан қорғау мақсатында Қазақстан Республикасы Ұлттық Ұланынан 60 жауынгер мен Төтенше жағдайлар департаментінің 37 қызметкері жұмылдырылды. Нәтижесінде, 17 500 қапшыққа құм толтырылып, қажетті аймақтарға төселді.
Аудандағы су тасқынының алдын алу бойынша жұмыстар жоспарға сай жүргізілуде. Қазіргі таңда Ойыл өзені өз арнасымен ағып жатыр, өр суының келуі тұрақты бақылауда. Су деңгейі тәулік бойы қадағалануда. Тасқын су қаупін азайту мақсатында Сағыз-Миялы-Қарабау-Индер бағытындағы автомобиль жолының 298-шақырымындағы «Кенен» көпірінде аудандық полиция бөлімі жүк көліктерінің жүруіне уақытша шектеу қойды.
Төтенше жағдайға қарсы шаралар
Күні бүгінге дейін барлығы 144 адам және 66 техника, оның ішінде, Төтенше жағдайлар министрлігінен – 37 адам, 3 техника, Ішкі істер министрлігінен – 20 адам, 10 техника, жергілікті атқарушы органдардан – 67 адам, 53 техника, 20 ерікті жұмылдырылды.
Сонымен қатар, материалдық-техникалық қамтамасыз ету мақсатында қосымша жабдықтар мен қажетті құралдар қоры толықтай жасақталып, аудандағы су тасқыны жағдайы толығымен бақылауға алынған. Жауапты органдар мен мамандар тасқынның алдын алу және салдарын жою бағытында тынымсыз жұмыс атқаруда. Тұрғындардың қауіпсіздігі басты назарда, кез келген өзгерістер шұғыл түрде хабарланып, тиісті шаралар қабылдануда. Қазіргі таңда Ойыл өзенінен келер қауіп жоқ, дегенмен тасқынды болдырмау және қауіпсіздік шаралары қатаң бақылануда. Бұл ретте аудан әкімі аппаратының жұмылдыру дайындығы және азаматтық қорғаныс бөлімінің бастығы Мақсат Төкенов:
- Қазіргі уақытта аудан бойынша 18 850 қап қапталды. Сонымен қатар, әр округте Атырау облысы Төтенше жағдайлар департаментінің қызметкерлерімен Сағыз, Ойыл, Жангелдин, Қызылқоға, Жамбыл, Тасшағыл, Көздіғара, Тайсойған ауылдары және Қоғам, Аққора елді мекендеріне су деңгейіне мониторинг жүргізілуде. Жағдай бір қалыпты. 2024 жылы көктемгі су тасқыны кезінде Миялы-Қарабау-Индер маңызы бар тас жолындағы Ойыл өзенінің Кенен көпіріне зақым келіп, “АссанаДорСтрой” жауапкершілігі шектеулі серіктестігі мердігерлік мекемесімен қалпына келтіру жұмыстары жүргізілген болатын. Алайда, биыл Ойыл өзені арнасына келген судың деңгейі өзінің нормасына сай ағуы кезінде Кенен көпірінде құрылыс жұмыстары жүргізілген аймақ төмен отырып, тас жолдың бетінде жарық пайда болды. Қазіргі уақытта жоғарыда аталған мердігер мекеме бақылауға алып, осал жерлерін қалпына келтіру жұмыстарын жүргізуде, – деді.
Барлығы бақылауда
Аймақтағы су нысандарының деңгейі тұрақты бақылауда. Қазіргі уақытта су тасқыны қаупі тіркелмеген. Алайда, мамандар судың деңгейін тұрақты қадағалап, кез келген өзгерістер туралы тиісті органдарға ақпарат беруді жалғастыруда. Мәселен, Ойыл бойымен Ералы су торабынан: 2022 жылы – 310 982 272 текше метр су өтсе, 2023 жылы – 635 482 245 текше метрге жеткен, 2024 жылы – 718 369 927 текше метрді құраған. Биыл «ҚазСуШар» РМК-ның Атырау облысы филиалы Қызылқоға өндірістік учаскесінің бастығы Сайлаубек Темірғалиевтің айтуынша, қазірге дейін 204 089 590 текше метр су өткен. Ауданға төнер қауіп жоқ. Осы орайда аудандық мәслихат депутаты Есенбай Нұров:
- Менімен бірге Төтенше жағдайлар басқармасының қызметкерлері, қоғамдық кеңестің мүшелері және аудан белсенділері 1 сәуір күні Құм өткелдің басына барып қайттық. Жақында аудан әкімі Ойыл мәселесімен айналысып жүрген белсенділерді жинап, жиын өткізген болатын. Өйткені Миялы тұрғындары Ералыны жауып, суды реттеу, көлімізге су шығару мәселесін көтерген еді. Қазіргі таңда Кенен көпірінің жағдайы қиын. Былтырғы су тасқыны көпірді зақымдады, ол толық жөнделген жоқ, тек уақытша қалпына келтірілді. Қазір 24 текше метрден су өтіп жатыр. Оның алдыңғы жағында Ойыл өзені тереңдетілді, соның салдарынан бұл тұсқа көп су келіп жатыр. Жоғарғы арнаның екі жағын бекітіп тастағаннан кейін және Тентекқара тұсынан да су көптеп құйылып, Кенен көпіріне қауіп төніп тұр. Егер Ералыны жабар болсақ, Кенен көпірінің қайта бұзылу қаупі бар. Сондықтан біз Құм өткел тұсындағы жайылмаға шығып жатқан судың арнасын кеңейту үшін сонда бардық. Сол жерде бір жарым сағаттай жұмыс жүргізіп, арнаны аршыдық. Осы жұмыстардан кейін Кенен көпірін барып көрдік, өзгеріс жоқ, су ағып жатыр, деңгейі 5 сантиметрге төмендеген. Бірақ жалпы жағдай бір қалыпты. Сонымен бірге Ақтөбе облысы, Ойыл ауданы, Қарасу тұсындағы көпірде арнаның 1-2 метрге төмен түскені байқалып отыр. Ол жер бізден 50-60 шақырым қашықтықта, сондықтан 2-3 күнде су деңгейі төмендей бастайды деп болжап отырмыз. Қоғамдық кеңес мүшелері мен белсенділер өткен жолы Қамысты көлдің бойын ашқан болатын, қазір су жақсы кетіп, Қамысты көлге құйып жатыр. Жағаға жайылған судың барлығы Қамысты көлге тіке ағып, одан әрі Жарыпшыққан өзені арқылы Тайсойғанға тарайды. Қазіргі уақытта халықтың басты тілегі – Сарбасты көліне, су келетін басқа жерлерге молырақ суды шығарып алу. Бұл мәселе күн тәртібінде тұр, алдағы уақытта осы бағытта жұмыстар жүргізетін боламыз,-деді.
Қорыта айтқанда қазіргі таңда Ойыл өзенінің деңгейі тұрақты бақылауда, мамандар жағдайды жіті қадағалап отыр. Кенен көпіріне қауіп бар, алайда су деңгейін реттеу бағытында тиісті жұмыстар жүргізілуде. Алдағы күндері су деңгейінің төмендеуі күтілуде, әсіресе Қарасу тұсындағы арнаның түсуі бізге жақсы белгі. Сондай-ақ, Қамысты көлге су келіп, Жарыпшыққан арқылы Тайсойғанға таралуы – аймақтағы су балансын реттеуге оң ықпалын тигізеді. Басты мақсат – тасқынның алдын алу және халықтың қауіпсіздігін қамтамасыз ету. Бұл бағытта жауапты органдар мен мамандар жүйелі түрде жұмыс жүргізеді деп сенеміз.
Самғат ҚАЙРАТҰЛЫ
