Парижде өтетін 2024 жылғы Олимпиаданы ұйымдастыру комитеті турнирде таныстырылатын спорт түрлерінің тізімін жариялады, деп хабарлайды Egemen.kz.

Тізімнен каратэ, бейсбол және софтбол ойындары алынып, жаңа бағдарламаға брейк-данс қосылған. Халықаралық Олимпиада комитеті іс-шараның бағдарламасын, спортшыларға сәйкес квоталарды және Париж 2024 Олимпиада ойындарына жаңа спорт түрлерінің интеграциясын растады. Ұйымдастыру комитеті бағдарламаның түпкілікті екенін және оны өзгертуге болмайтынын айтты.

Дүниежүзілік каратэ федерациясының президенті Антонио Эспиноса спорттың бұл түрі Олимпиада ойындарына оралуы керек екенін айтты. «Біз әлемге каратэнің ерекше спорт түрі екенін көрсеттік. Ол арнайы спорттық дайындықты және арнайы техниканы қажет етеді. Бұл Олимпиадаға ұсына алатын спорт, өйткені ол Олимпиадалық құндылықтарға сәйкес келеді», деді Эспиноса.

Айта кетейік, 2024 жылдың 26 шілдесінде Париж әлемді Олимпиада ойындарында үшінші рет қарсы алады (жарыстар 1900 және 1924 жылдары өтті). Сонымен қатар Франция үшін бұл алтыншы Олимпиада болады: ел үш рет қысқы ойындарды ұйымдастырды: Шамони-1924, Гренобль-1968 және Альбервиль-1992.

egemen.kz