Биылғы "Жұмысшы мамандықтары" жылы аясындағы әр мерекелі күн берекелі еңбекті, еңбек адамына құрметті паш етуімен де ерекшеленді деп айта аламыз. Солардың бірі мұнайшы ағайынға арналған салтанатты шара.
Иә, қасиетті Нарын құмының қойнауынан алынған «қара алтын» – тек өңірдің емес, күллі елдің экономикалық қуатын арттырған құнды байлық. Сол байлықтың көзін ашып, ел игілігіне жаратып отырған ірі кәсіпорындардың бірі – «Жайықмұнайгаз» мұнай-газ өндіру басқармасы. Бүгінде бұл басқарма Исатай ауданының ғана емес, облыстың экономикалық өрлеуіне елеулі үлес қосып келе жатқан қуатты өндірістік ұжымға айналды. Жылдар бойы қалыптасқан дәстүрге сай «Жайықмұнайгаз» басқармасы қыркүйек айының алғашқы жексенбісінде Мұнай-газ кешені қызметкерлерінің кәсіби мерекесін ерекше ықыласпен атап өтеді. Бұл жолы да «Жалын» мәдениет үйінде өткен салтанатты шара мұнайшылардың қажырлы еңбегіне деген құрметтің айқын көрінісіндей болды.
Алғашқы құттықтау сөзді «Ембімұнайгаз» АҚ Бас директорының кадр және әлеуметтік мәселелер жөніндегі орынбасары Қайрат Әбенов алып, көпшілікті мерекемен құттықтады.
– Жарты ғасырдан астам уақыт ішінде бұл өндірістен талай буын мұнайшы шыңдалып, еңбегімен елдің мерейін өсірді. Еділ мен Жайықтың қос өзенінің арасында өркен жайған өндіріс ордасы бүгінде де іргелі істерімен мақтанышқа айналып отыр. Қазіргі таңда басқарма жаңа технологияларды батыл енгізіп, заман талабына сай қарыштап дамуда. Соның айқын айғағы – Газпоршенді электр стансасының іске қосылуы. Бұл жоба кен орындарын өзіміздің өндірген электр энергиясымен қамтып, басқарманың энергетикалық тәуелсіздігін арттыруға әрі тиімділікті көтеруге жол ашты, – дей келе, Ембі өндірісінің дамуына қосқан зор үлесі және табысты еңбегі үшін бірқатар қызметкерлерге арнайы марапаттар табыстады.
Атап айтқанда, Қазақстан Республикасы Энергетика министрлігінің «Мұнай-газ кешенін дамытуға қосқан үлесі үшін» медалі, «ҚазМұнайГаз» ҰК» АҚ-ның «Естелік белгісі» мен «Алғыс хаты», сондай-ақ «Ембімұнайгаз» АҚ Құрмет грамотасы өндіріс майталмандарына табыс етілді. Айта кетерлігі, марапаттардың басым бөлігі жұмысшы мамандарға арналды. Бұл қарапайым еңбегімен өндірістің өркендеуіне үлес қосып жүрген жұмысшылардың мерейін көтеріп, олардың қажырлы еңбегін бағалаудың айқын көрінісі болды.
Марапатталғандардың бірі – «Мұнай-газ кешенін дамытуға қосқан үлесі үшін» медалін өңіріне қадаған №1 мұнай және газ өндіру цехының 5-дәрежелі мұнай және газ өндіру операторы Мақсот Сүндетқалиев. Өмірін өндіріске арнаған майталман маман осы салада 33 жыл бойы табан аудармай еңбек етіп келеді. Бүгінгі марапат – сол ұзақ жылдар бойғы маңдай тер мен адал еңбектің әділ бағасы.
– Иә, қай сала да оңай емес. Әсіресе өндіріс саласының қиындығы өз алдына. Қыста – қақаған аяз, жазда – аптап ыстық. Осындай жағдайда еңбек ету шыдамдылық пен табандылықты талап етеді. Бірақ ең үлкен қуаныш – маңдай тердің нәтижесін көру, ел сенімін ақтау. Бүгінгі марапат – біздің еңбегімізге берілген зор баға, баршамызға үлкен серпін, – дейді ол ризашылықпен.
Содан соң, Компанияның Басқарма төрағасы қызметінің жетекшісі Алмас Идрисов пен омбудсмен Айбар Ерекешов бір топ сала мамандарына «Ембімұнайгаз» АҚ «Алғыс хатын» табыстады. Бұған қоса, «Мұнайшы қыз» клубының бастамасымен биыл бесінші рет өткізіліп отырған, «Жұмысшы мамандықтары жылына» орай ұйымдастырылған «Мерейлі мұнайшы» байқауына ұсынылған 35 видеотүсірілім ішінен үздік деп танылған екі жеңімпаз – аталған басқарма қызметкерлеріне де марапаттар табысталды.
Келесі кезекте Исатай ауданы әкімінің міндетін атқарушы Нұрберген Утегенов, «Ембімұнайгаз» АҚ Кәсіподақ комитетінің төрағасы Болат Нсанбаев, «Жайықмұнайгаз» МГӨБ бастығы Жасұлан Беркалиев мұнайшыларды мерекемен құттықтап, марапаттар табыстады. Басқарма қызметкерлерімен қатар, тығыз әріптестік орнатып отырған бизнес серіктестердің де еңбегі ескерусіз қалмады.
Салтанатты кеш соңы Дина Нұрпейісова атындағы Академиялық халық аспаптар оркестрінің концертіне ұласып, өнер ұжымының орындауындағы шетелдік және отандық фильмдердің саундтректері жиналған көпшілікке ерекше мерекелік көңіл-күй сыйлады.
Жайна МӘЛІМҚОЖА
Нарын таңы
