Астанадан ақжолтай хабар жетіп, теміржол саласында табанды еңбек етіп, адал қызметімен ел алғысына бөленген жерлесіміз Ермек Зағыпаров жақында үлкен марапатқа ие болды. Мемлекет басшысы Қасым-Жомарт Тоқаевтың Жарлығымен «Құрмет» орденімен наградталып, аудан мерейін асырды. Мемлекеттік марапатты Көлік министрі Нұрлан Сауранбаев арнайы табыстап, Ермек Зағыпаровтың ғана емес, теміржол саласында аянбай еңбек еткен барша ардагерлерге үлкен құрмет көрсетілді.
Ермек Зағыпаров 1957 жылы Гурьев облысы, Қызылқоға ауданы, Қарабау ауылында дүниеге келіп, 1964 жылы Н.Крупская мектебінің табалдырығын аттап, 1974 жылы Құлсарыдағы Абай атындағы орта мектепті тәмамдады. Әскери борышын өтеп келгеннен кейін Атырау теміржол техникумын аяқтап, 1979 жылы еңбек жолын Маңғыстау теміржол бекетінде бастайды. Алғашында пойыз құрастырушы болып қызметке кірісіп, кейін Маңғыстау мен Сайөтес бекеттерінде кезекші, одан соң «ӨзенОпорный» учаскесінің жол қауіпсіздігі ревизоры қызметін атқарады.
Қызмет жолында тек тәжірибемен шектелмей, кәсіби білімге де баса мән берген ол 1991-1994 жылдары Қазақстан Теміржол Академиясын үздік бітіріп, жаңа талаптарға сай жұмыс істеуге ұмтылды. 1989-2000 жылдар аралығында Құлсары бекетінде басқарушы болып, теміржол қозғалысын үйлестіруде, қауіпсіздікті ұстануда еселі еңбек етеді. Кейін «Теңізшевройл» ЖШС-нің теміржолмен тасымалдау бөлімінде жол қозғалысы қауіпсіздігі аға инспекторы ретінде де беделді қызмет атқарды. 42 жылдық еңбек жолы – қажырлы қызметке толы жылдар. Ұзақ жылдар теміржол саласында еңбек етіп, 2020 жылы ұзақ күткен зейнеткерлікке шықты.
Зейнетке шыққанымен қоғамдық жұмыстарға белсенді араласқан ол «Алтын медаль» төсбелгісімен, «Құрмет грамотасы», Махамбет Өтемісұлының 200 жылдығына арналған «Дауылпаз» төсбелгісімен және түрлі деңгейдегі Алғыс хаттармен марапатталды. Ермек Зағыпаровтың тағылымды өмір жолы отбасындағы тәрбиемен де үндеседі. Өмірлік жары Клара Матжанқызымен бірге екі ұл, бір қыз өсіріп, ұрпағына темірдей тәртіп пен еңбекқорлықты үлгі етіп келеді. Балалары бүгінде әке жолын қуып, теміржол саласында қызмет етуде. Қазіргі таңда 9 немеренің, 3 жиеннің ардақты атасы.
Ермек Қабдырахманұлының «Құрмет» орденімен марапатталуы – ауданымыз үшін де үлкен мәртебе. Бұл тек бір адамның жетістігі емес, аудан теміржолшыларына көрсетілген мемлекеттік деңгейдегі құрмет. Адал еңбегімен, абыройлы болмысымен көптің алғысына бөленіп жүрген Ермек Зағыпаровтың еңбегі жас буынға – өнеге, әріптестеріне – мақтаныш.
А.МОЛДАШЕВ
Жылой ауданы
