ХХІ еңбек маусымына 1000 жас қамтылып, салтанатты жабылу кешінде белсенділігімен ерекшеленген 24 сарбазға 120 мың теңге көлемінде сыйақы және ағылшын тілі курсына тегін сертификат табысталды. Бұл туралы Өңірлік коммуникациялар қызметі хабарлайды.
Жобаның басты мақсаты – жастарды уақытша маусымдық жұмысқа тарту арқылы еңбекке баулуды қолдау, туған өлкенің тазалығы мен көркейуіне үлес қосқан жас сарбаздардың еңбегін бағалау.
Бағдарлама барысында облыстық Ішкі саясат басқармасының бөлім басшысы Айдар Жален құттықтау сөз сөйлеп, жас сарбаздардың еңбегін атап өтті.
⁃ Сіздерді бірінші рет жұмыс істеп, алғашқы жалақы алуларыңызбен құттықтаймын. Сіздер адал еңбек ете отырып, туған жер мен мекен еткен қала, аудан, ауылымызды тазалықта ұстадыңыздар. Бұл жобаның осы арқылы жас ұрпаққа берері мол, - деді А. Жален.
Жоба өткен үш айда «Таза Қазақстан» акциясы тоғыз рет ұйымдастырылып, оған 1300 адам тартылды. Сонымен қатар бүгінгі жиында жобаның үйлестіруші мамандары «Жасыл ел» республикалық штабының алғыс хатымен марапатталды.
Салтанатты жиынға 100-ге жуық Атырау облысы Ішкі саясат басқармасының өкілі, облыс орталығы мен аудандық округтерден келген «Жасыл ел» сарбазы, қала және аудан координаторы, облыстық штаб қызметкерлері қатысты.
