Мемлекет басшысы Қасым-Жомарт Тоқаевтың өңірлердегі мәдениеттің сапасын көтеріп, көркейту үшін оның қолжетімділігін қамтамасыз ету бағытында берген тапсырмасына сәйкес өткен жылы басталған Роза Бағланова атындағы «Қазақконцерт» мемлекеттік концерттік ұйымы «Ел бірлігі – Жаңа Қазақстан» жобасы аясында елімізде концерттік бағдарламасын жалғастыруды қолға алды.
Соған сай, гастродьдік сапармен Атырау облысының барлық ауданын аралап келе жатқан аталмыш концерттік ұйымның танымал өнерпаздары біздің ауданға да ат басын тіреп, «Арман» мәдениет үйінде концерттік бағдарламасын ұсынды.
Республикалық байқаулардың лауреаты Әлихан Дүйсенбайдың арнауымен ашылған сахна шымылдығы одан әрі «Астана сазы» қазақ мемлекеттік фольклорлық ансамблінің орындауында Құрманғазының «Қызыл қайың серпер», жерлес сазгер Бауыржан Ақтаевтың «Арнау», «Қайран елім», «Заман», Жаяу Мұсаның «Ақ сиса» шығармаларымен жалғасты. Айта кетсек, аса талантты өнерпаздардан құралған «Астана сазы» қазақ мемлекеттік фольклорлық ансамблінің көркемдік жетекшісі «Алаш ұстазы» төсбелгісінің иегері, сазгер, Қызылқоға ауданының Құрметті азаматы Бауыржан Ақтаев. Ансамбль мүшелері домбыра, қылқобыз, сыбызғы, жетіген, сазсырнай, шаңқобыз, дауылпаз, сырнай және басқа да аспаптарда ойнады.
«Дарын» мемлекеттік жастар сыйлығының лауреаты Асқар Мұқият, республикалық, халықаралық ән байқауларының лауреаты, Мәдениет саласының үздігі Перизат Тұрарова аталмыш ансамбльдің сүйемелдеуімен және домбырамен «Жиырма бес», «Сәулем-ай», «Алай көк» секілді халық әндерімен бірге Үкілі Ыбырайдың «Гәкку», М.Ержановтың «Сайра, бұлбұл», Т.Ақанның «Қазақша» әндерін тамылжыта шырқап, тыңдармандардың ыстық ықыласына бөленді. Концерттік бағдарламада күйшілер Ардақ Елеусіз, Нұркен Яхияев, Дарын Құдайберген күйлер топтамасымен бірге Махамбеттің «Жұмыр қылыш» күйін күмбірлетсе, Бауыржан Ақтаев ансамбльдің сүйемелдеуімен өзінің «Шаңқобызға арнау» шығармасын орындап, Әлихан Дүйсенбай «Жібек екенсің», «Күнім» әндерін шырқады. Шара шымылдығы халықаралық байқаулардың лауреаты Уайс Райымның орындауында Қ.Сариннің «Шынарым сен үшін», Ә.Салабековтің «Наурыз» әнімен жабылды.
Көрермендер тәнті болған шырайлы шараның соңында аудан әкімінің орынбасары Жарас Есенғалиев ауыл тұрғындарына көңілді кешті тарту еткен өнерпаздарға ризашылығын білдіріп, аудан әкімінің алғыс хаты мен ықылас гүлін тарту етті.
Бауыржан САҚТАСИНОВ
