Жас кәсіпкер Арухан Жеңісова аудан орталығында «Серік» отбасылық кулинария кафесін ашты.
Еліміздегі 2017-2021 жылдарға арналған «Бастау Бизнес» нәтижелі жұмыспен қамту және жаппай кәсіпкерлікті дамыту бағдарламасы аясында Арухан 505 мың теңгенің грантына ие болды. Бұл қаржыға ол кафенің ас үйіне қажетті құрал-жабдықтарды сатып алды. Жаңа кәсіпкерлік нысанда караоке, балаларға арналған бөлме, play station ойын және 40 адамға арналған тамақтану залы жабдықталған. Кулинариядан бөлек ас мәзірінде фаст-фуд өнімдері ұсынылады. Заманауи үлгіде әсем де көрікті дизайнмен сәнді стильдегі ашылған бұндай орынның ауылымызда ашылуы көңілімізге қуаныш ұялатып тұр.
Арухан Жеңісова, жас кәсіпкер:
– Бұл кәсіппен айналысуыма көмектесіп, демеушілік жасаған туған ағам Бауыржан Сабытаевқа алғысым шексіз. Біздің мақсатымыз – халыққа қолжетімді, сапалы қызмет ұсыну. «Бастау Бизнес» бір айлық курсынан үйреніп, білген-түйгенімді осы кәсібіме пайдаға асырып жатырмын. Ой-арманымның шындыққа айналып жатқанына қуаныштымын. Кәсіпкерлік жолында бұдан да бөлек жоспар-жобаларым бар. Ол уақыт еншісінде. Қаладан ауылын сағынып келген замандастарына, ауыл жастары мен осында келген қонақтарға бос уақыттарын көңілді, әрі есте қаларлықтай өткізуге ыңғайлы орын.
Әсел ТАУШАНОВА
