Аудандық «Қызылқоға» газетінің бетінде әртүрлі тақырыптар жарияланып, барлығы дерлік қамтылып жатыр.
Соның ішінде, біз секілді айтар пікірі бар газет оқырмандары үшін арнайы «Оқырман және біз» беті ашылып, оқырманның ұсыныс-пікірлері жарияланып отырады. Мұнда әр округтегі тұрғындардың, тіпті көрші Индер ауданынан да келген оқырман хаттарының легін оқып жатырмыз.
Осы орайда, мен Көздіғара ауылының тұрғындарының тілегін жеткізгім келіп отыр. Күнбе-күн ауыл тұрғындарын аудан орталығына жеткізу – менің басты міндетім. Әрине, бұл күндері жұмыстағы азаматтар мен азаматшалар жұмыс уақытында сұранып келеді. Ал, сол жұмыстағы азаматтар сенбі, жексенбі күндері арнайы көлік жалдап аудан орталығына келгенде, барлық азық-түлік, киім дүкендері жабық тұрады. Негізі адамға қажеттілік көп туындайтын уақыт сенбі-жексенбі күндері. Сондықтан, аптаның дүйсенбі күні демалыс жариялап, ал сенбі, жексенбі күндері дүкендер түгелдей ашық тұрса қандай жақсы?! Алыс ауылдан келгендіктен көтерме сауда орындарынан азық-түліктерді көптеп алады. Осы пікір аяқсыз қалмайды деген сенімдемін.
Маридат ҚҰРМАНҒАЗИЕВ,
Көздіғара ауылдық округінің тұрғыны.
