Атырау облысының Махамбет ауданында орналасқан көне Сарайшық мекенінде өткен SARAISHYQ MARATHON 2026 республикалық марафоны жоғары деңгейде ұйымдастырылып, кең ауқымды спорттық әрі мәдени іс-шараға айналды. Бұл бастама өңірдегі бұқаралық спортты дамытуға серпін беріп қана қоймай, тарихи мұраны дәріптеудің жарқын үлгісін көрсетті.
Марафон облыстық дене шынықтыру, спорт және туризм басқармасының қолдауымен және RunclubAtyrau жүгіру клубының ұйымдастыруымен өтті. Жыл сайын ауқымы кеңейіп келе жатқан жарыс биыл да еліміздің түкпір-түкпірінен жиналған қатысушыларды бір арнаға тоғыстырды. Атап айтқанда, Орал, Ақтөбе, Ақтау қалаларынан келген спортшылармен қатар, түрлі этнос өкілдері де белсенділік танытты. Жалпы саны 700-ден астам адам қатысқан марафон – бұқаралық спорттың қарқынды дамып келе жатқанын айқын көрсетті.
Ерекше атап өтерлігі, жарысқа 20-ға жуық мүмкіндігі шектеулі адамның қатысуы. Бұл – қоғамда инклюзивті ортаның қалыптасып келе жатқанын, спорттың баршаға ортақ екенін дәлелдейтін маңызды көрсеткіш. Олар да өзге қатысушылармен бірге түрлі қашықтықтарда бақ сынап, жігер мен қайсарлықтың үлгісін көрсетті.
-Қатысушылар 3, 5, 10 және 21 шақырым қашықтықтар бойынша жарысқа түсіп, әрқайсысы өз деңгейінде мықтылығын дәлелдеуге тырысты. Әсіресе, жартылай марафон (21 км) қашықтығы кәсіби спортшылар үшін үлкен сынақ болды. Жарыс барысында қауіпсіздік шаралары толық сақталып, медициналық және еріктілер тобы үздіксіз қызмет көрсетті, — дейді аталған басқарманың өкілдері.
Салтанатты ашылу рәсімінде облыс әкімі аппаратының басшысы Нұрлыбек Жеңісбекұлы қатысушыларға жылы лебізін білдіріп, марафонның маңыздылығына тоқталды. Ол өз сөзінде мұндай ауқымды іс-шаралар жастарды спортқа баулып, салауатты өмір салтын қалыптастыруда үлкен рөл атқаратынын атап өтті. Осыдан кейін ресми түрде жарысқа старт берілді.
Тартысты өткен дода қорытындысында үздік нәтиже көрсеткен спортшылар арнайы марапаттарға ие болды. Жеңімпаздар мен жүлдегерлерге дипломдар, медальдар және бағалы сыйлықтар табысталды. Бұл марафон көптеген жас спортшылар үшін өз мүмкіндігін көрсетуге үлкен алаң болды.
Марафонның ерекшелігі – оның тек спорттық шарамен шектелмей, мәдени-танымдық мазмұнмен толықтырылуында. Іс-шара аясында қатысушылар мен қонақтарға көне Сарайшық қалашығының тарихы кеңінен таныстырылды. «Сарайшық» мемлекеттік тарихи-мәдени музей-қорығына арнайы экскурсия ұйымдастырылып, келушілер қазақ даласының өткенінен сыр шертетін құнды деректермен танысты.
Сонымен қатар, марафон барысында жергілікті кәсіпкерлер мен қолөнершілердің қатысуымен көрме-жәрмеңке өтті. Мұнда ұлттық нақыштағы бұйымдар, қолөнер туындылары, кітаптар мен сувенирлер ұсынылып, келушілердің ерекше қызығушылығын тудырды. Бұл өз кезегінде өңірдегі шағын және орта бизнесті қолдауға да оң ықпал етті.
Жалпы алғанда, SARAISHYQ MARATHON 2026 – спорт, тарих және мәдениетті бір арнаға тоғыстырған маңызды жоба. Мұндай шаралар өңірдің туристік әлеуетін арттырып қана қоймай, халықты салауатты өмір салтына баулуға, ұлттық құндылықтарды дәріптеуге үлкен үлес қосады. Сарайшықта өткен бұл марафон алдағы жылдары да дәстүрлі түрде жалғасын тауып, халықаралық деңгейдегі додаға айналуы әбден мүмкін.
Алтыншаш ҚҰРМАШЕВА
