Биылғы көктемгі науқан барысында өңірдің 184,8 гектар аумағына 467,2 мың дана ағаш көшеті отырғызылды. Сонымен қатар, ірі мұнай-газ кәсіпорындарымен жасалған меморандумдар аясында 351,8 гектар жерге 331 273 ағаш көшеті егілді.
Бұл туралы облыстық Табиғи ресурстар және табиғат пайдалануды реттеу басқармасының басшысы Жантас Оспан мәлім етті, - деп хабарлайды Өңірлік коммуникациялар қызметі.
⁃ Биыл 266 экологиялық іс-шара ұйымдастырылып, оған 75,5 мыңнан астам адам қатысты. 210 сенбілік өткізіліп, 6 542 тонна қоқыс шығарылды, 8 483 аула тазартылды. Бұдан бөлек, білім беру ұйымдарында өткен экологиялық акциялар мен ашық сабақтарға қырық бес мыңнан астам оқушы мен жас эколог қатысты, - деді Ж. Оспан.
Сондай-ақ, өңірде жаңа экопарктер салу, қалдықтарды басқару жүйесін жетілдіру және жасыл аймақтарды кеңейту бойынша бірқатар жоба іске асырылуда.
