Қазақстан спорт саласын жаңа деңгейге көтеруге бағытталған маңызды қадам жасады. Елімізде алғаш рет Қазақ ұлттық спорт университеті (ҚҰСУ) құрылып, өз жұмысын бастады. Бұл бастама спорттық білім мен ғылымды ұштастырып, халықаралық талаптарға сай білікті кадрлар даярлауға мүмкіндік береді.
ҚҰСУ – тек жоғары оқу орны ғана емес, спорт индустриясының болашақ мамандарын қалыптастыратын заманауи білім беру және зерттеу орталығы. Университетте жаттықтырушылар, спорт менеджерлері, спорт психологтары, спорт дәрігерлері, сондай-ақ спорттағы цифрлық технологиялар мен жасанды интеллект бағытында жұмыс істейтін мамандар даярланбақ.
Жаңа университеттің басты мақсаты – қазақстандық спорттың тұрақты дамуына үлес қосатын кәсіби кадрлар резервін қалыптастыру, ғылым мен тәжірибені біріктіру және халықаралық деңгейде бәсекеге қабілетті мамандарды тәрбиелеу.
Осы тақырып аясында өткен подкаст барысында ҚҰСУ проректоры Александр Нефтисов университетті құру идеясының маңыздылығы, білім беру бағдарламаларының ерекшеліктері, талапкерлерге ұсынылатын мүмкіндіктер және еліміздің кез келген өңірінен білім алуға жол ашатын тетіктер туралы кеңінен әңгімеледі.
Сұхбат барысында университеттің білім беру жүйесіндегі жаңашыл бағыттары, спорт ғылымын дамытуға қосатын үлесі және болашақта Қазақстан спортының сапалы кадрлық әлеуетін қалыптастырудағы рөлі жан-жақты талқыланды.
Қазақ ұлттық спорт университетінің ашылуы – еліміздегі спорттық білім беру саласының дамуына серпін беретін және жаңа буын спорт мамандарын даярлауға бағытталған стратегиялық жоба. Бұл бастама Қазақстан спортының халықаралық аренадағы бәсекеге қабілеттілігін арттыруға және саланың жаңа кезеңге қадам басуына негіз қалайды.
