«Таза Қазақстан» экологиялық жобасы мен «Заң мен тәртіп» қағидаты аясында Мақат ауданында қоршаған ортаның тазалығын сақтау бағытында рейдтік-профилактикалық іс-шара өткізілді.
Мақат аудандық полиция бөлімі мен аудан әкімдігі қызметкерлері бірлескен рейд барысында Доссор кентінің аумағын тексерді. Тексеру кезінде белгіленбеген жерге қоқыс тастау және рұқсат етілмеген қоқыс үйіндісін орналастыру фактілері анықталды.
Анықталған дерек бойынша кінәлі тұлғаға қатысты Әкімшілік құқық бұзушылық туралы кодексінің 505-бабы бойынша әкімшілік хаттама толтырылып, заңға сәйкес тиісті шара қабылданды.
Мамандардың айтуынша, елді мекеннің тазалығы тек коммуналдық қызметтердің жұмысына емес, тұрғындардың да жауапкершілігіне байланысты. Қоқысты белгіленбеген жерге тастау қоршаған ортаға зиян келтіріп қана қоймай, әкімшілік жауапкершілікке әкелуі мүмкін.
Полиция мен жергілікті атқарушы органдар тұрғындарды қоқысты арнайы белгіленген орындарға тастап, қоғамдық тәртіп пен тазалық талаптарын сақтауға шақырады.
«Таза Қазақстан» тазалықты өз ауламыздан, өз көшімізден бастауға үндейді.
