15 шілдеде Atyrau Creative Hub алаңында «1 сағатта әлеуметтік жоба» атты интерактивті ойын-тренажер (хакатон) өтті. Іс-шараны «Qabilet» қоғамдық қоры «Теңізшевройл» компаниясының Әлеуметтік инвестициялар бағдарламасы аясындағы қаржылық қолдауымен жүзеге асырылып жатқан «Qabilet ҮЕҰ қауымдастығы» жобасы шеңберінде ұйымдастырды.
Іс-шараға 2026 жылғы жобаның Атырау және Құлсары қалаларынан келген қатысушылары, қазақ және орыс тілді топтар, сондай-ақ алғаш рет жаңа қатысушыларға тәлімгер болған 2025 жылғы бағдарлама түлектері қатысты. Мұндай формат тәжірибе сабақтастығын қамтамасыз етіп, өңірдегі үкіметтік емес ұйымдар мен волонтерлердің кәсіби қауымдастығын нығайтуға, сондай-ақ жоба қатысушыларының түрлі буындары арасында білім мен тәжірибе алмасуға мүмкіндік берді.
Хакатонның негізгі мақсаты – «Qabilet Start» мектебінде алынған әлеуметтік жобаларды әзірлеу дағдыларын бекіту болды. Қатысушылар небәрі 60 минут ішінде толыққанды әлеуметтік жоба тұжырымдамасын әзірлеп, оны қазылар алқасының алдында қорғады. Сонымен қатар ойын командалық жұмыс, стратегиялық ойлау, келіссөз жүргізу, көпшілік алдында сөйлеу және шешім қабылдау дағдыларын дамытуға ықпал етті.
Хакатон барысында командалар бір сағат ішінде өздерінің әлеуметтік жобаларын әзірледі. Қатысушылар өзекті әлеуметтік мәселелерді анықтап, SMART қағидаты бойынша мақсаттар мен міндеттерді тұжырымдады, мақсатты аудиторияны белгіледі, іс-шаралар жоспарын, шығындар сметасын, күтілетін нәтижелер мен жобаның әлеуметтік әсерін әзірледі, әлеуетті серіктестер мен қаржыландыру көздерін айқындап, кейін өз бастамаларын қазылар алқасы мен басқа қатысушыларға таныстырды.
Өткен жылғы бағдарлама түлектері командаларға ментор ретінде қолдау көрсетті. Олар қатысушыларға идеяларды талдауға, тиімді шешімдер табуға және әлеуметтік жобаларды әзірлеу кезінде жиі кездесетін қателіктердің алдын алуға көмектесті. Бұл ретте тәлімгерлер кеңесші әрі фасилитатор ретінде жұмыс істеп, жобаларды қатысушылардың орнына орындаған жоқ.
Ойын қорытындысы бойынша екі үздік жоба анықталды: бір жеңімпазды қазылар алқасы таңдаса, екіншісін қатысушылар өздері анықтады. Үздік бастамалардың авторлары жобадағы белсенділік рейтингін арттыру мүмкіндігіне, жеке консультацияларға, естелік сыйлықтарға және өз жобаларын «Qabilet» қауымдастығы аясында одан әрі дамыту мүмкіндігіне ие болды.
«Qabilet ҮЕҰ қауымдастығы» жобасы екінші жыл қатарынан (2025–2026 жылдар) жүзеге асырылып келеді. Жобаның мақсаты – волонтерлерді оқыту, жаңадан құрылған және жұмыс істеп тұрған үкіметтік емес ұйымдарды қолдау және оқыту, сондай-ақ ҮЕҰ, мемлекеттік органдар, бизнес және жергілікті қауымдастықтар арасындағы әріптестікті дамыту арқылы Атырау облысында азаматтық қоғамды нығайту.
