Атырауда мектеп бағдарламасын меңгеруде қиындық көріп жүрген оқушыларға арналған жаңа жоба іске қосылды. «Cerebrum» нейротүзету клиникасы «Эйнштейн» атты бағытты ашты — бұл балалардағы когнитивтік бұзылыстарды анықтап, түзетуге арналған бағдарлама.
Мамандардың айтуынша, төмен үлгерім жалқаулықпен немесе интеллектінің төмендігімен байланысты емес. Көп жағдайда себеп — мидың жұмысындағы жасырын ерекшеліктер: дислексия, дисграфия, зейін тапшылығы. Жаңа жоба дәл осы мәселелермен жұмыс істейді.
«Cerebrum» клиникасы Атырауда 2020 жылдан бері жұмыс істейді. Алғашында ол аутизм, сөйлеу және даму кідірісі бар балаларға көмектесу үшін ашылған. Алайда уақыт өте келе ата-аналар басқа мәселеге тап бола бастаған — бала дені сау, бірақ мектеп бағдарламасын меңгере алмайды. Бұл жағдай жеке бағыт ашуға себеп болды.
«Эйнштейн» жобасы заманауи нейротехнологияларға негізделген кешенді, дәрі-дәрмексіз түзету бағдарламасын ұсынады. Репетиторлықтан айырмашылығы — мұнда салдармен емес, себеппен жұмыс істейді: мамандар диагностика жүргізіп, нақты бұзылыстарды анықтап, аппараттық әдістер арқылы түзетеді. Әр балаға бағдарлама жеке жасалады.
«Бізге жылдар бойы жауап іздеп жүрген ата-аналар келеді. Көбіне оларға “балаңыз жай ғана зейінсіз” деп айтады. Бірақ шын мәнінде олай емес. Бұл балалар ақылды, тек олардың миы басқаша жұмыс істейді. Олар үшінші сыныпта буындап оқуы мүмкін, бірнеше минуттан артық зейінін ұстай алмайды, өздері байқамай қателеседі. Біздің міндет — жазалау немесе жаттықтыру емес, мәселенің себебін анықтап, ми жұмысына дұрыс бағыт беру», — дейді клиника негізін қалаушы, дәрігер-невропатолог Лаура Исаева.
Бес жыл ішінде «Cerebrum» бір кабинеттен толыққанды орталыққа айналды. Қазір оның жеке ғимараты, төрт кабинеті және бес маманнан тұратын командасы бар. Жыл сайын мұнда 1500-ге дейін отбасы жүгінеді, олардың басым бөлігінде алғашқы курстан кейін-ақ оң өзгерістер байқалады. Сонымен қатар кейбір қызметтер жеңілдетілген шарттармен көрсетіледі.
Орталықтың дамуына «Жарқыра» бағдарламасы да үлкен үлес қосты. Бұл бағдарлама «Теңізшевройл» компаниясының қолдауымен жүзеге асуда.
«Біз “Cerebrum” сияқты бастамаларды қолдауға қуаныштымыз. Балалар дер кезінде көмек алып, қатарластарымен тең дәрежеде білім алу мүмкіндігіне ие болғанда — бұл бүкіл өңірдің болашағына жасалған нақты инвестиция», — деді ТШО-ның үкімет және қоғаммен байланыс жөніндегі бас менеджерінің орынбасары Ерлан Қасым.
Алдағы уақытта «Cerebrum» клиникасы мектепке дейінгі балаларға арналған ерте диагностика бағытын дамытуды, ата-аналарға арналған оқыту бағдарламаларын енгізуді және мамандарды даярлауды жоспарлап отыр. Негізгі мақсат — Атырауда кез келген кезеңде көмекке жүгіне алатын толыққанды орталық қалыптастыру.
