Атырау қаласында заманауи концерт залы мен музейді қамтитын ірі мәдени нысанның құрылысы қарқын алды. Былтыр іргетасы қаланған нысанда бүгінде инженерлік желілер тартылып, ғимараттың қабаттары тұрғызылуда. Құрылыс алаңына 100-ге жуық маман жұмылдырылған, - деп хабарлайды Өңірлік коммуникациялар қызметі.
Қазір облыс орталығында мамандандырылған концерт залы жоқ. Бұл жаңа мәдени нысанға деген қажеттілікті арттырып отыр. Кешенде концерттермен қатар, салтанатты іс-шаралар, ресми кездесулер, көрмелер мен конференциялар өткізу жоспарланған.
Осы арқылы жоба өңір тұрғындары үшін заманауи мәдени кеңістік қалыптастыруды көздейді.
-Құрылыс жұмыстары кезең-кезеңімен жүзеге асып жатыр. Нысанды 2028 жылдың мамыр айында пайдалануға беру жоспарланған. Ғимараттың жалпы аумағы – 38 мың шаршы метр, – деді Атырау облысы Құрылыс басқармасының бөлім басшысы Алтынбек Қуанғали.
Нысанның бас мердігері – «ASPAN HOLDINGS» ЖШС. Техникалық қадағалауды «Строй Проф» ЖШС, ал авторлық қадағалауды «Engineering Center LTD» ЖШС жүзеге асырады.
