«Келешек мектебі» ұлттық жобасы – еліміздегі білім беру жүйесін жаңғыртуға бағытталған маңызды бастамалардың бірі. Мемлекет басшысы Қасым-Жомарт Тоқаевтың тапсырмасымен жүзеге асырылып жатқан жоба ауыл мен қала мектептері арасындағы білім сапасындағы алшақтықты азайтып, барлық балаға сапалы білім алуға тең мүмкіндік жасауды көздейді.
Ұлттық жобаның негізгі мақсаты – апатты және үш ауысымды мектептердің мәселесін шешу, оқушылар үшін қауіпсіз әрі заманауи білім беру ортасын қалыптастыру. Соның нәтижесінде Қазақстанның қай өңірінде тұрса да, әрбір бала бірдей жағдайдағы мектепте білім алуға мүмкіндік алады.
Бүгінде жаңа үлгідегі мектептердің 40 пайыздан астамы ауылдық елді мекендерде салынуда. Бұл ауыл балаларының сапалы білімге қолжетімділігін арттырып қана қоймай, өңірлердің әлеуметтік дамуына да оң әсерін тигізуде. Сонымен қатар жаңа мектептердің ашылуы білікті педагогтердің ауылға келуіне және ауылдағы өмір сапасының жақсаруына ықпал етуде.
«Келешек мектептері» заман талабына сай жабдықталған. Оларда кең әрі жарық оқу кабинеттері, заманауи зертханалар, шығармашылық шеберханалар, кітапханалар, спорт және өнер залдары, демалыс аймақтары қарастырылған. Мұндай білім беру ортасы оқушылардың жан-жақты дамуына және мұғалімдердің тиімді жұмыс істеуіне қолайлы жағдай жасайды.
Жоба аясында мектептердің қауіпсіздігіне де ерекше көңіл бөлінген. Әрбір білім беру ұйымында бейнебақылау жүйелері, кіруді бақылау құралдары және цифрлық қауіпсіздік жүйелері орнатылған. Бастауыш және жоғары сынып оқушылары үшін бөлек блоктар қарастырылып, ерекше білім беру қажеттілігі бар балаларға бейімделген сыныптар мен кедергісіз орта жасақталған.
Ұлттық жобаны іске асыру барысында отандық өндірушілердің өнімдеріне басымдық берілуде. Мектеп жиһаздары мен оқу жабдықтарының едәуір бөлігі қазақстандық кәсіпорындардан сатып алынып, бұл өз кезегінде ішкі өндірістің дамуына және жаңа жұмыс орындарының ашылуына мүмкіндік беріп отыр. Ал құрылыс материалдары мен жобалау шешімдері халықаралық сапа талаптарына сәйкес таңдалады.
Қазіргі таңда Алматы, Астана қалаларында, сондай-ақ Түркістан, Маңғыстау, Қызылорда және Атырау облыстарында жаңа мектептердің құрылысы қарқынды жүргізілуде. Әрбір жаңа білім ордасы – еліміздің болашағына салынған инвестиция.
«Келешек мектебі» ұлттық жобасы – жай ғана жаңа ғимараттар салу емес. Бұл – білім беру сапасын арттыруға, ауыл мен қала арасындағы мүмкіндіктерді теңестіруге және бәсекеге қабілетті ұрпақ тәрбиелеуге бағытталған ұзақ мерзімді мемлекеттік бастама. Жоба нәтижесінде Қазақстандағы әрбір бала өз әлеуетін толық жүзеге асырып, сапалы білім алуға тең мүмкіндікке ие болады.
Н. Насыр
