Құрманғазы ауданында көлік инфрақұрылымын дамыту бағытында 8 жол жобасы іске асырылуда. Бүгінде аудан аумағындағы жалпы ұзындығы 282 шақырым болатын «7-разъезд – Асан – Азғыр – Балқұдық – Сүйіндік» автомобиль жолын жаңғырту жұмыстары кезең-кезеңімен жүргізіліп жатыр, - деп хабарлайды Өңірлік коммуникациялар қызметі.
Облыс орталығынан шалғай орналасқан Балқұдық ауылында 7 шақырым, Сүйіндік ауылында 9 шақырым ауылішілік жол салу жоспарланған. Мердігер мекеме анықталғаннан кейін құрылыс жұмыстары басталады.
Қазір «7-разъезд» жолының 0–36 шақырым учаскесінде құрылыс жұмыстары басталды. Ал 36–98 шақырым аралығына жобалық-сметалық құжаттама әзірленіп, мемлекеттік сараптаманың оң қорытындысы алынған. Мердігерді анықтау үшін конкурс жарияланды. Сонымен қатар 98–180 шақырым жол учаскесіне жобалау жұмыстары жүргізілуде.
– Сонымен қатар ауданның бірнеше ауылында ауылішілік жолдарды салу және жаңғырту жұмыстары жоспарланған. Атап айтсақ, Дәшін және Орлы ауылдарында 10 шақырымнан, Жыланды ауылында 7 шақырымға жуық, Жұмекен ауылында 11, Даулеткерей ауылында 7, Ақкөл ауылында 14 шақырымға жуық жол құрылысы жүріп жатыр, – деді облыстық Жолаушылар көлігі және автомобиль жолдары басқармасының бөлім басшысы Нұржау Маратов.
Аталған жобалар толық іске асырылғаннан кейін Құрманғазы ауданындағы жақсы және қанағаттанарлық жағдайдағы жолдардың үлесі 57 пайызға жетеді.
