Қазақ қоғамында әйел затының орны айрықша. Оның бойында ақыл мен сұлулық, парасат пен көрегендік үйлесім тапқан. Қандай кезең болмасын, әйелдер отбасының берекесін сақтап, туған жердің дамуына өз үлесін қосып келеді. Аналардың мейірімі мен қамқорлығы қоғамға жылулық сыйлап, адамгершілік құндылықтардың нығаюына негіз болып отыр. Сондықтан мұндай жандар қай кезеңде де зор құрметке лайық.
Халықаралық әйелдер күніне орай Махамбет атындағы академиялық қазақ драма театрында өткен салтанатты іс-шараның негізгі арқауы да осы болды.
Мерекелік кешке облыс әкімі Серік Шәпкенов қатысып, халқымыз ежелден әйел-ана мен қыз баланы ерекше құрметтейтінін атап өтті.
– Қазіргі қоғамда әйел тек отбасының ұйытқысы ғана емес, түрлі салада табысты еңбек етіп келеді. Сонымен қатар отбасында бала тәрбиесіндегі рөлі мен жауапкершілігі тіптен зор. Себебі дені сау, білімді әрі тәрбиелі ұрпақ – қуатты мемлекеттің кепілі. Сондықтан мерейлі мерекеде сіздерге және отбасыларыңызға зор денсаулық, бақыт пен бақ-береке тілеймін, – деді С.Шәпкенов.
Салтанатты жиында өңірдің дамуына қосқан үлесі мен адал еңбегі үшін бірқатар нәзікжанды марапатталды.
«Құрмет» орденімен Атырау облыстық кардиологиялық орталығының директоры Сандуғаш Жұмағалиева наградталды.
«Ерен еңбегі үшін» медалі ақын Бақытгүл Бабашқа, «Жүректен жүрекке» қоғамдық қорының әлеуметтік жобалар үйлестірушісі Әсел Ғұмароваға, Атырау облысы әкімдігі аппаратының бас маманы Гүлнар Құрманғалиеваға, №4 арнаулы әлеуметтік қызметтер көрсету орталығының шаруашылық мейіргері Гүлфара Сұлтановаға, Қызылқоға ауданындағы Ы.Шөреков атындағы мектеп-гимназиясының мұғалімі Гүлфайруз Қуанышеваға табысталды.
Мерекелік бағдарлама өнерпаздардың концерттік бағдарламасымен жалғасып, көрермендерге әсем әндер мен әсерлі музыкалық нөмірлер тарту етті.
Тоғжан ЕРМЕК
Суреттерді түсірген Ерлан АЛТЫБАЕВ
