Құқықтық мемлекет құру – әр азаматтың заңды құрметтеуінен басталады. Заңның үстемдігі сақталған қоғамда тәртіп орнығып, халықтың қауіпсіздігі мен әл-ауқаты артады. Сондықтан заң талаптарын орындау – мемлекеттік органдардың ғана емес, барша азаматтың ортақ міндеті. Бүгінде қоғамдық тәртіпті сақтау, құқық бұзушылықтың алдын алу және құқықтық мәдениетті қалыптастыру бағытында жүйелі жұмыстар жүргізілуде.
Дегенмен, кез келген заң бұзушылықтың алдын алудың ең тиімді жолы – әр адамның өз ісіне жауапкершілікпен қарауы. Көшеде, қоғамдық орында, жол қозғалысында немесе интернет кеңістігінде болсын, заң талаптарын сақтау қоғамдағы тұрақтылықтың кепілі болып қала береді. Әсіресе жастар арасында құқықтық сауаттылықты арттырудың маңызы зор. Заңды білу – өз құқығыңды қорғап қана қоймай, өзгенің құқығына құрметпен қарауға тәрбиелейді. Мектептен бастап отбасында, білім беру ұйымдарында және қоғамдық ортада құқықтық тәрбиеге ерекше көңіл бөлінуі қажет. Соңғы жылдары цифрлық технологиялардың дамуына байланысты интернет арқылы жасалатын құқық бұзушылықтар да көбейіп келеді.
Сондықтан азаматтар күмәнді ақпаратқа сенбей, жеке деректерін қорғап, киберқауіпсіздік талаптарын сақтауы маңызды. Заң мен тәртіп – елдің тұрақты дамуының, қоғамдық келісім мен қауіпсіздіктің негізі. Әрбір азамат заңға құрметпен қарап, өз міндетін адал орындағанда ғана әділетті әрі өркениетті қоғам қалыптасады. Қоғамдық тәртіпке бейжай қарамай, заң талаптарын бұлжытпай орындау – ел болашағына қосылған нақты үлес.
Айжарқын Қабиева, Миялы ауылдық округінің бас маманы
