Қоршаған орта – адамзат өмірінің негізі, тіршіліктің қайнар көзі. Табиғаттың тазалығы мен әсемдігі – әрбір азаматтың саналы іс-әрекетіне байланысты. Бүгінде экологиялық мәселелер әлем бойынша өзекті болып отыр. Ауа ластануы, тұрмыстық қалдықтардың көбеюі, табиғи ресурстардың азаюы – осының барлығы адамның табиғатқа деген жауапсыздығынан туындайды.
Сондықтан қоршаған ортаны қорғау – тек мемлекет пен арнайы мекемелердің ғана емес, әрбір адамның ортақ міндеті. «Тазалық өзімізден басталады» деген ұғым – терең мағыналы қағида. Әр адам өз үйінен, өз ауласынан, өз көшесінен бастап тазалықты сақтаса, қоғамда үлкен өзгеріс болады. Қоқысты бей-берекет тастамау, табиғатты ластамау, қоғамдық орындарды таза ұстау – мәдениеттіліктің белгісі.
Сонымен қатар, экологиялық мәдениетті қалыптастыру жас ұрпақтан басталуы тиіс. Балаларға табиғатты аялау, қоршаған ортаны құрметтеу туралы тәрбие беру – болашақтың кепілі. Тазалық жұмыстары тек сенбілікпен шектелмеуі керек. Ол – күнделікті өмір салтына айналуы тиіс. Әрбір тұрғын өз айналасының тазалығына жауапкершілікпен қарап, табиғатты қорғауға үлес қосуы қажет. Көгалдандыру, ағаш отырғызу, қалдықтарды сұрыптау сияқты қарапайым әрекеттердің өзі үлкен нәтижеге жеткізеді. Қорытындылай келе, қоршаған ортаны қорғау – баршамызға ортақ парыз. Табиғатқа жанашырлықпен қарап, тазалықты сақтай білсек, келер ұрпаққа көркем әрі таза әлем қалдырамыз.
Ендеше, тазалықты әрқайсымыз өзімізден бастайық.
Кәмшат ӨТЕПОВА,
маман
