Тазалық – әрбір тұрғынның мәдениеті мен туған жеріне деген жанашырлығының айқын көрінісі. Ауылдың таза әрі көрікті болуы тек коммуналдық қызметтердің жұмысына ғана байланысты емес.
Бұл – барша ауыл тұрғындарының ортақ міндеті. Егер әрбір азамат өзі тұратын аумақтың тазалығына мән беріп, ауласын, көше маңын ретке келтірсе, ауылымыздың ажары одан әрі арта түсері сөзсіз. Қазақ халқында «Тазалық – саулық негізі, саулық – байлық негізі» деген нақыл сөз бар. Бұл сөздің мағынасы өте терең. Таза орта – адамның денсаулығы мен өмір сапасының кепілі. Сондықтан қоршаған ортаның тазалығын сақтау – әрбір азаматтың күнделікті өмір салтына айналуы тиіс. Осы ретте Жамбыл ауылдық округінің тұрғындары да «Таза Қазақстан» акциясы аясында ұйымдастырылған сенбіліктерге белсенді түрде қатысып келеді. Әрбір тұрғын өз үйінің ауласын, қора-жай маңын, көшесінің бойын тазалап, ауылымыздың көркеюіне үлес қосуда.
Бірлікпен атқарылған іс әрқашан нәтижелі болмақ. Ауылымыздың тазалығы мен көркеюі – баршамыздың ортақ мақсатымыз. Табиғатты қорғап, қоршаған ортаны таза ұстау арқылы келер ұрпаққа көрікті әрі жайлы ауыл қалдыру – әрқайсымыздың азаматтық борышымыз.
Зайда СУАТОВА,
Жамбыл ауылдық округі әкімдігі аппаратының бас маманы
