Табиғат – баршамызға ортақ байлық. Демалыс күндері өзен-көл жағасына, саябақтарға немесе табиғат аясына шыққанда, айналаны таза ұстау – әрбір азаматтың мәдениеті мен жауапкершілігінің көрінісі.
Өкінішке қарай, кейбір демалушылар қоқысын жинамай кетіп, табиғатқа зиянын тигізіп жатады. Мұндай әрекет қоршаған ортаға ғана емес, келесі келушілердің жайлы демалуына да кері әсер етеді. Сондықтан әркім өзінен кейінгі орынды таза қалдырып, тұрмыстық қалдықтарды арнайы жәшіктерге тастауы немесе өзімен бірге алып кетуі қажет.
Тазалық – үлкен істерден емес, қарапайым әдеттерден басталады. Табиғатты аялау арқылы біз балаларымызға жақсы үлгі көрсетіп, туған өлкеміздің көркеюіне өз үлесімізді қосамыз. Таза табиғат – денсаулықтың, жайлы демалыстың және жарқын болашақтың кепілі.
Сондықтан табиғат аясында демалған әрбір азамат тазалықты сақтап, қоршаған ортаға жанашырлықпен қарауға тиіс.
Гүлнұр Асанғалиева,
Миялы ауылының тұрғыны
