Экономикалық даму – кез келген мемлекеттің алғы шарттарының бірі. Ал, мемлекеттің экономикалық тұрғыдан дамуы үшін тұрғындардың қаржылық жағынан сауатты болуы аса маңызды.
Яғни, әрбір адам түскен табысына мұқият болып, шығындарын сауатты түрде есептеп, қолындағы қаржысын басқара алуы тиіс. Сонымен қатар, Қазақстандағы экономикалықдаму соңғы бірнеше жылда маңызды өзгерістер мен өсім көрсеткен, бірақ бұл процесс күрделі және көп факторға тәуелді.
Осы тұста, "Елдің экономикалық дамуының негізгі аспектілеріне нені жатқызар едіңіз?" деген сұрағымызға Қ. Сәтпаев атындағы техникалық университетінің оқытушысы, экономика ғылымдарының кандидаты Құралай Сәкібаеваның айтуынша, Қазақстанның экономикасы негізінен мұнай мен табиғи ресурстарға тәуелді. Мұнай мен газ өндіру саласы елдің экспорттық табысының негізгі бөлігін құрайды.
Сонымен қатар, елімізде металлургия, химия, құрылыс материалдарын өндіру салалары да маңызды рөл атқарады. Қазақстанның аграрлық секторында егіншілік пен мал шаруашылығы маңызды орын алады. Экономикалық даму деңгейі әлеуметтік салаларға да әсер етеді. Мектептер, ауруханалар, тұрғын үй құрылысы мен әлеуметтік қамсыздандыру бағдарламаларының жақсаруы халықтың әл-ауқатын көтеруге мүмкіндік береді. Қазақстанның қаржы секторы дамып келеді, бірақ сыртқы экономикалық және саяси тәуекелдерге тәуелді. Елдің ұлттық валютасы – теңге, әлемдік нарықтағы мұнай бағалары мен басқа да факторларға байланысты құбылып отырады. Сыртқы сауда және инвестициялар: Қазақстан сыртқы саудаға үлкен көңіл бөледі. Еуропа мен Азия арасындағы транзиттік әлеуеті зор.
Сондай-ақ, Қытай мен Ресеймен қарым-қатынас экономикалық даму үшін маңызды. Қазақстанның экономикалық дамуы тұрақты өсуді көрсетсе де, мемлекет көптеген құрылымдық реформа мен сыртқы экономикалық факторларға тәуелді. Экономиканың әртүрлі салаларын дамыту және тәуелділікті төмендету мақсатында инвестициялар мен инновациялар көбейтілуде.
Өз тілшіміз
